Services

Tasiilami isumaginninnermi suliniutit nutaat annertuut

Borgmester Charlotte Ludvigsen ullumikkut Tasiilami isumaginninnermi suliniutinik nutaanik marlunnik atoqqaartitsivoq

Tasiilami ilaqutariit ajornartorsiuteqartut ukioq maanna ikiorserneqarnissaminnut marlunnik neqerooruteqarfigineqalissapput.  Illoqarfik nutaamik Anaanat Meeqqallu angerlarsimaffittaarpoq, tassani angajoqqaanngorlaat inuuniarnermikkut ajornartorsiuteqartut tapersersorneqartassallutik taavalu inuusuttunut sullissivittaarluni meeqqanik anginernik tapersersuiffiusussamik, inuusuttunullu 18-ileereersimasunut sullinneqareersimasunut namminersulernissaannut ikorfartuiffiussalluni.

Borgmester Charlotte Ludvigsen ullumikkut Tasiilami meeqqanut inuusuttunullu ajornartorsiuteqartunut neqeroorutinik nutaanik marlunnik atoqqaartitsivoq. 

Ullumikkut ulloq uannut nuannaarfiuvoq, qinigaaffimmi uani Kommuneqarfik Sermersooq meeqqanut ilaqutariinnullu tunngasuni sullissineq pitsanngorsarniarlugu iliuuseqangaatsiarpoq. Minnerunngitsumillu meeqqanut inuuniarnermikkut ajornartorsiuteqartunut ilaqutaasunullu neqeroorutitta annertusarnissaat pingaartissimavarput. Sulili anguniagarput angunngilarput. Suli pitsanngorsaasinnaaqaagut, ukiunili kingullerni aamma angusaqarsimaqaluta” borgmesteri oqalugiarnermini oqarpoq.

Anaanat Meeqqallu angerlarsimaffiat anaananut meeqqanullu ulluunerani neqeroorutitaqarpoq, taavalu ulloq unnuarlu pinartoqartillugu ilaqutariinnut ataatsinut marlunnulluunniit inissaqarluni. Sapaatip akunnerani ullut tamaasa nal. 8.00-miit 20.00 tungaanut ammasaraluarluni. Angajoqqaat tapersersortinnissamik pisariaqartitsisut tapersersorneqartassapput, qitornaasut inuunermik pitsaasumik aallartilluarniassammata.

Anaanat Meeqqallu angerlarsimaffiat suliniutaasimasuni uummateqarluarfigisama ilagaat. Ilimagaara angajoqqaat tamarmik, meeraqarnerup akisussaaffiup annertuup tigumminerani tassanngaannaq kisimiittutut nalornisutullu misigilerneq aqqusaarnikuussagaat. Maanna Tasiilami angajoqqaat inuuniarnermikkut ajornartorsiuteqartut peqqinnissaqarfimmiit, perorsaasuniit, isumaginninnikkullu suliaqarfimmiit sullissisuniit ilisimasalinniit suliassaminnullu pikkorissuniit ikorfartorneqarnissaminnut periarfissaqalerput. Meeqqamut angajoqqaanullu pissarsiaqarluarfiunissaa qularutiginngilara,” Charlotte Ludvigsen oqarpoq.

Inuusuttunik Sullissivik Ulloq Unnuarlu immikkoortortaqassaaq 14-iniit 18-inut ukiulinnut, katillugit arfineq-pingasut qulillu tungaannut inissalimmik, suliniuteqareernermilu malitseqartitsinermut neqeroorut ulloq unnuarlu ingerlanneqartumik 18-iniit 23-nut ukiulinnut, arfinilinnik inissalik. Kiisalu inuusuttunik immikkut pisariaqartitsisunik perorsaanerup iluani ulluunerani neqeroorut aqqaneq-marlunniit 18-inut ukiulinnut. Inuusuttut neqeroorummik ingerlatsisut tamarmik ulluinnarni immersorlugit sammisaqartinneqartassapput. Sammisassat sapinngisamik nunatta kangiani kulturimik inooriaatsimillu aallaaveqartarput. Inuusuttut suliffimmik ilinniakkamilluunniit unitsitsinatik ingerlaannarsinnaanissaannut tapersersorneqassapput pitsaasumik inuuneqarnissaat qulakkeerneqassammat.

Eqimattakkaarluni katsorsartinnissamut neqerooruteqarpoq ilaatigut inuusuttunut iluaqutaasinnaasumik. Inuusuttut aanngajaarniutinik pinngitsuuisinnaajunnaarsimasut pinaveersaarluni inuuneqarnissaannut sulisunit tapersersorneqartarput.

“Neqeroorutitsialaavoq, tassanilu inuusuttut sakkortuunik atugaqarsimasut nammineerlutik inuulernissaminnut ikiorneqarsinnaapput. Naggasiullugu uku neqeroorutit marluk pillugit Tasiilaq pilluaqqorusuppara. Siunissami iluaqutigineqarnissai qularutiginngilara. Kommuneqarfik Sermersuumiit inuusuttunut inuuniarnermikkut ajornartorsiutilinnut neqeroorutinik ineriartortitsineq ingerlattuassavarput. Pitsanngoriaateqarsinnaajuaannarpugummi.”, Charlotte Ludvigsen oqarpoq.