Services

Siunnersuutit politikerinut saqqummiuguk

Kommunalbestyrelsip innuttaasut politikikkut ataatsimiititanut toqqaannaq siunnersuuteqarsinnaanerat ammaappaa.

Politikkerinut eqqartugassanngortinneqarsinnaasumik isumassarsiaqarpit, taamaappat Kommuneqarfik Sermersuumi peqataatitsinermut tunngatillugu nittartagaa Kommuneqarfiga aqqutigalugu innuttaasutut siunnersuuteqarsinnaavutit. Siunnersuutit ullut 90-it ingerlaneranni innuttaasunit 250-init taperserneqarpat politikikkut ataatsimiititami attuumassuteqartumi qaqinneqassaaq.

”Uannut pingaaruteqarpoq, pisariaqarfiini innuttaasut isumaannik tusarniaasarnissaq. Innuttaasut siunnersuuteqarsinnaalernerat isumaqarpunga, alloriarnerusoq annertooq, taamaalillunimi innuttaasut nammineerlutik iliuuseqarsinnaalerput, politikeriusugullu isumassarsiagut kisimik aalajangiiffigiinnarneqaratik”, Kommuneqarfik Sermersuumi borgmesteri, Charlotte Ludvigseni oqarpoq.

Kommuneqarfik Sermersooq Nunatsinni oqartussani siullersaalluni innuttaasut toqqaannaq siunnersuuteqarnissaannik aaqqissuussivoq, danskilli folketingimi Amerikamilu naalakkersuisut assingusumik aaqqissuussaqareerput.

Kommunimi innuttaasoq kinaluunniit peqataasinnaavoq, ugguuna www.kommuneqarfiga.gl. Innuttaasut internetimut attaveqaateqanngitsut siunnersuummik tapersiinissamut siunnersuuteqarnissamulluunniit immersugassaq atugassaat suliarineqarumaarpoq. Immersugassaq Innuttaasunik Sullissivimmi saqqummerneqassaaq.

Borgmesterip qilanaaraa, innuttaasut politikkerinut sunik siunnersuuteqassanersut takusaqarfigissallugu:

”Neriuppunga, naatsorsuutiginngilluinnakkannik siunnersuummik takkuttoqarumaartoq, siunertaavorli isumassarsianik nutaanik saqqummertoqarnissaa”,  Charlotte Ludvigsen oqarpoq.