Sermersooq Business borgmesterilu Charlotte Ludvigsen sisamanngormat 10. klassimi atuartunik workshopertitsinissamut qaaqqusipput. Siunissami Tasiilami inuussutissarsiuteqarneq sammineqarpoq.
”Tasiilami inuussutissarsiutitigut pilersaarutissatsinnut isumassarserusulluta inuusuttut illoqarfimmi sorlermi najugaqarusunnersut siunissamilu suna suliffigerusussaneraat aperaavut”, Kommuneqarfik Sermersuumi Inuussutissarsiornermut pisortaq Emil Skjervedal oqarpoq.
Workshopimi inuusuttut computer-tabletit atorlugit apeqqutinut arlalinnut akissuteqarput. Tallimanngorpat inersimasut inuussutissarsiortut apeqqutit taakkua akissuteqarfigissavaat.
”Akissutigineqartut suli misissoqqissaanngilavut, inuusuttullu amerlasuunik pitsaasunik isumassarsiaqaqaat, amerlanerillu siunissami inuussutissarsiutaareersunik soorlu aalisarneq, piniarneq takornarialerinerlu suliffigissallugit kissaatigaat ”, Emil Skjervedal oqaluttuarpoq
Akissutit tamarmik misissorneqareerpata ukiuni sisamani Tasiilami inuussutissarsiutitigut ineriartornermi pilersaarummut ilanngunneqassapput kommunalbestyrelsimit isummerfigineqartussanngorlutik.
