Services

Sermersooq nutaamik nittartagartaarpoq

NemID aamma e-Boks nunatsinni atorneqartussanngortinneqarnera ilutigalugu nittartakkakkut imminut sullissinnaanermut atortut nutaat atorneqarsinnaanerat pitsanngorsarneqarpoq, taamaasilluni kommuunip nittartagaa atoruminarnerulerluni.

Sermersooq.gl saqqummersitaq nutaamik ilusilersugaqarlunilu imai aaqqissorneqarnera pitsaanerulerpoq. Taakkua saniatigut paasissutissanik ujaarliut pitsaalluinnartoq, atuisunut pitsaanerusumik misigisitsisussaq pilersinneqarpoq.

”Innuttaasunut amerlasuunut nittartagarput tassaavoq kommuunimut iserfik pingaarneq. Taamaammat uannut pingaaruteqarluinnarput atoruminarnissaa. Nutaamik nittartagartaarnerput alloriarneruvoq pitsaasuuvoq. Teknologii pitsanngoriartortillugu nittartagarput ineriartortittuassavarput, innuttaasunut amerlanerusunut atorneqarsinnaanngorlugu. Imminut sullinnissamut atortut arlaqartut pilersissassullugit pilersaarutigaarput”, taama oqarpoq Kommuneqarfik Sermersuumi borgmesteri Charlotte Ludvigsen.

Nittartagaq nutaaq atulersinneqarpat, pilersaarutaavoq innuttaasut imminut sullissinnaaneranut periarfissat amerlisarnissaat, aamma innuttaasut ingerlatsiviillu attaveqaqatigiinnerat eqaallisarneqarnissaat nutaamik nittartagaqarlernerup kingunerissavaa.

”Nittartagarput pitsanngoriangaatsiarpoq, kisianni sulineq suli naammassinngilaq. Aamma naammassinngisaannassaaq. Teknologii nutaaq nutaanik periarfissiivoq, taamaattoqarneralu ilutigalugu nittartagarput pitsanngorsartuassavarput. Innuttaasunut sulisunullu inerisaanermi immersueqataallutik peqataasimanerannut qujarusuppunga,” Charlotte Ludvigsen naggasiivoq.

IT-mik annertuunik suliaqarnerni teknikkikkut unammillernartoqarsinnaasarpoq. Nittartagaq nutaaq nanisinnaassanngikkaluarukku, imaluunniit pitsanngorsaataasinnaasunik siunnersuutissaqaruit kommuunimi attaveqaqatigiinnermut immikkoortortaanut attaveqartuaannarsinnaavutit, uunga allallutit: kommunikation@sermersooq.gl