Piniarneq, Aalisarneq Nunalerinerlu

Sermersooq aalisarnermut pilersaarummik akuersissuteqarpoq

Kommunip sinerissap qanittuani aalisarnermi suliniuteqarneq piorsarpaa – pingaartumik Tunumi 

Kommuneqarfik Sermersuumi Kommunalbestyrelsip sinerissap qanittuani aalisarneq pillugu immikkoortumut pilersaarut akuersissutigaa.  Immikkoortumut pilersaarut kommunimi inoqarfinni tamani aalisartut periarfissaannik atugassarititaannillu misissuineruvoq.  ”Aalisartutut piniartutullu inuuneq pinngortitami peqqarniitsumi sakkortusinnaavoq, taamaattumik suliassaqarfimmi tassani immikkoortumut pilersaarusiorsinnaagatta nuannaarutigaara, ulluinnarni aalisartut atugarisaannik pitsaanngorsaataasinnaasumik”, Kommuneqarfik Sermersuumi borgmesteri Charlotte Ludvigsen oqarpoq.

Immikkoortumut pilersaarut piffissami kingullermi Kommuneqarfik Sermersuumi suliniutaavoq sinerissap qanittuani aalisarnermik piorsaataasussaq. Inoqarfinni amerlasuuni kommune umiatsianik iluasaasarfinnik qalulerivinnillu aalisartunut atugassaqartitsivoq, taamatullu umiatsiaaqqat amerlanersaat kommunip puttasuini pitussimasarlutik. Aasaq Nuummi kalaaliaraq nutaaq atoqqaartinneqarpoq, aammalu ukioq manna Tasiilami tuniniaavik sananeqartussaavoq. Aamma aalisartut piniutitik illuaqqani piniutaasivinniitissinnaavaat, akikitsunnguanngorlugu kommunimit attartortakkaminni.

Pilersaarutip akuersissutigineqannginnerani Kommuneqarfik Sermersuumi aalisarnerup piorsaavigineqarnissaanut suliniutinik aallartitsiaarsimavoq.

”2016-imili Tunumi aalisakkanik tunisassiorfik ammaqqinneqarmat arlaleriarluta Tasiilami pikkorissartitsisarlutalu isumasioqatigiissitsisarpugut, aalisartorpassuit peqataaffigisartagaannik inuussutissarsiutertillu pillugu nutaanik ilisimasaqarfigilertagaannik. Tamakkua kingunerivaat ilaqutariit 80-it ullumikkut aalisarnermit isertitaqalersimanerat”, Charlotte Ludvigsen oqarpoq.

Taakkua saniatigut Kommuneqarfik Sermersooq Tunumi nunaqarfinni illoqarfinnilu tamani ikaanik pilersitsiortorpoq, taamaasillutik aalisartut aalisakkanik panertitsisalerniassammata, nunatsinni avammullu tunisassiassanik.

”Kommune tamakkerlugu aalisarfiussasoq sulissutigaarput, ukioq kaajallallugu isertitaqarfiusinnaasumik. Taamaaliornissamut ikaat iluaqutaassapput, Tunumi aalisartorpassuit ukiuunerani tunitsivissaqarniassammata”, Charlotte Ludvigsen oqaluttuarpoq.

Kommuneqarfik Sermersooq aamma Aalisarnermut, Piniarnermut Nunalerinermullu Naalakkersuisoqarfimmut isumaqatigiissusiornikuuvoq Tunumi aalisarnerup ineriartortinneqarnissaa pillugu. Tamatuma kingunerivaa Kuummiini innaallagissiorfiup aasamut innaallagissamik pilersuinerata annertusineqarnissaa, taamaasilluni tunisassiorfiup pisinnaasai annertusiniassammata.