Services

Cheeky inuttaasunik sullissivimmi saqqummersitsilerpoq

Saqqummersitsineq “Urban Contemporary Art of Nuuk” seqqittaalluni qalipaasartumit Sacha Malinský-mit Cheeky-mik taaneqartartumit suliarineqarpoq. Saqqummersitsineq Nuummi innuttaasunik sullissivimmi marsip 12-iannit marsip 18-iata tungaanut takuniarsinnaavat.

Saqqummersitsinermi Cheeky-p Nuummi Masterclasseqarnerani assit 2020-mi aasami assilineqartut saqqummiunneqassapput. Saqqummersinneqartut tassaapput Masterclassimit titartakkat assillu, tamatumalu saniatigut aamma qarmakkani qalipakkat Nuummi Nuussuarmilu kusassaataajuartussat.

Masterclassip ingerlanneqarnerani Cheeky-p Nuummi eqqumiitsuliortut suleqatigiilluarnerunissaat siunertaraa.

”Kalaallit Nunaanni eqqumiitsuliortunik pikkorissorpassuaqarpoq, suleqatigiittoqarpiarnerli ajorpoq, tamannalu graffitiliornermi pingaaruteqarluni. Titarnerit assigiinngitsut naapikkaangata suliaq allatut anersaaqalersarpoq. Masterclassima ingerlannissaanut periutsima ilai katersorlugillu Nuummi inuussutissarsiutigalugu eqqumiitsuliortunut ingerlateqqinnissaat kajumilersitsivoq. Ilinniartitsininni, titartaaninni eqqumiitsuliortunillu pikkorissunik allanik ilagisaqarninni qaammatit kingulliit isumassarsiorfiusorujussuupput”, Cheeky oqarpoq.

Assinik saqqummersitsineq Cheeky-p nammineq kisimiilluni Kalaallit Illuanni 2020-mi septembarimiit novembarip tungaanut saqqummersitsineranut “Arctic Staycation”-imi ilaavoq.

Mastercalssimi graffitiliornerup oqaluttuarisaanera periutsillu eqqumiitsuliortunut toqqakkanut tallimanut ilisaritinneqarput, Katuallu saavani seqittaariaatsinik ilinniarlutik naggataagullu Cheeky kisimeeqatigalugu ilinniartinneqarlutik. Masterclassimi Nuummi qarmakkanik arfinilinnik qalipaasoqarpoq kiisalu illut isuani qalipaasoqarluni, tamarmik Cheeky-p nakkutiginninneratigut siunnersuineratigullu naammassineqartunik.

Cheeky-p Masterclassiani eqqumiitsuliortut tassaapput, Inuk Højgaard, Maria Kreutzmann, Christian Fleischer Rex, Nivi Lynge aammalu Malik Chemnitz.