Suliffeqarneq suliffissaarusimanerlu

Angerlarsimaffeqanngitsuunermut tamakkiisumik isiginnittaaseqarluni suliniuteqarnermut inisimavissaqarneq pingaarnerpaavoq

Kommuneqarfik Sermersuup kommunip innuttaasui angerlarsimaffeqanngitsut ikiorniarlugit suliniut nangippaa. Angerlarsimaffeqanngitsuuneq ajornakusoortuummat assigiinngitsorpassuarnillu peqquteqarmat politikerit isumaqatigiipput immikkoortumi suliniut tamakkiisumik isiginnittuussasoq. Alloriarneq siulleq tassaavoq inisimavissaqarneq, pissarsinissamullu angerlarsimaffeqanngitsunut sullissivik iluaqutaassaaq.

Borgmesterip Charlotte Ludvigsenip kommunalbestyrelsimi ataatsimiinneq naammagisimaartorujussuuaa, ataatsimiinnermilu angerlarsimaffeqanngitsuuneq pillugu immikkoortumut pilersaarut akuersissutigineqarpoq.

”Angerlarsimaffeqanngitsut uummateqarfigisorujussuuakka, isumaqarpungalu inuiaqatigiittut pitsaanerpaamik ikiorserniartariaqarivut. Taamaattumik naammagisimaartorujussuuara angerlarsimaffeqanngitsuuneq pillugu immikkoortumut pilersaarut akuersissutigisimagatsigu, pilersaarummi angerlarsimaffeqanngitsuunerup ajornakusoortuunera assigiinngitsutigullu ikiorserfigineqartariaqartuunera eqqarsaatersuutigineqarpoq. Soorunami sumiiffissaqartitsineq aallarniutigissavarput” angerlarsimaffeqanngitsunut sullissivissaq innersuussutigalugu Charlotte Ludvigsen taama oqarpoq.

Angerlarsimaffeqanngitsut angerlarsimaffeqanngitsunut sullissivimmut piginnaatitaaffilimmik ilisarnaasiissapput.

Kommuneqarfik Sermersuup inissiaatileqatigiiffia Iseritip Nuummi angerlarsimaffeqanngitsunut sullissiviup pilersinneqarnissaa isumagissavaa. Ukiup ingerlanerani ammarneqarnissaa naatsorsuutaavoq, ammarpallu angerlarsimaffeqanngitsut avatangiisit pilerseqataaffigisimasatik atorluarsinnaanngussavaat. Suliammi aallartinneraniilli peqataatinneqarnikuupput.

”Angerlarsimaffeqanngitsut suliap ingerlanerani peqataasimanerat sullissivimmullu kissaatigisaminnik nalunaaruteqarsimanerat nuannaarutigeqaara. Piumasaasami malinneqarnissaat isumalerujussuuvoq” taama oqarpoq borgmesteri Charlotte Ludvigsen.

Angerlarsimaffeqanngitsunut sullissivimmut pilersaarusiorneq suleqatigiiaanit suliarineqarpoq, Kommuneqarfik Sermersuumit, Naalakkersuisunit, Ilisimatusarfimmit, Kofoeds skolemit Frelsens hærimillu peqataaffigineqarluni. Suleqatigiiaallu angerlarsimaffeqanngitsunut siunnersortissarsiornikuupput pisariaqartitaat kissaataallu suliamut ilanngunneqarniassammata tamannalu politikkikkut akuerisaavoq.

Illu pingasunik quleriiaaqassaaq kujallerpaallu kujataaniissalluni. Ulloq unnuarlu sulisoqartarnissaa pilersaarutaavoq.

Unnuisarfik aniartuaarfittalik.

Angerlarsimaffeqanngitsunut sullissivik inunnut 140-nut inissaqartitsissaaq immikkoortunut marlunnut agguataagaq. Aappaa unnuisarfiussaaq, aappaalu ikaarsaarfiussalluni tamarmik 70-inik inissaqassallutik.

Soorlu taaguutaani oqariartuutigineqartoq, unnuisarfiup sumiiffissaqanngitsut qitiutissavai, ikaarsaarfiullu angerlarsimaffeqanngitsut inuiaqatigiinni nammineersinnaalernissaat anguniagassarissallugu.

Sullissivik inersuaqassaaq unnuisarfimmik ikaarsaarfimmillu ataqatigiilersitsisussamik. Tassani isertarfeqassaaq tassanilu angerlarsimaffeqanngitsut sulisunik tikilluaqquneqarsinnaassapput. Taamatuttaaq ataatsimoorfik oqaloqatigiittarfeqassaaq, ataatsimoorussamik errorsisarfik, toqqorsivik allallu sulisunut immikkoortortat. Aammattaaq najugaqartunut ataatsimoorussamik immikkoortortaqassaaq taannalu ataatsimoorfiusinnaallunilu igaffiusinnaassaaq.