Innuttaasunut

Nuummi qatserutaasivik nutaaq sanaartorneqalerpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ullumi Nuummi sila isseqaaq, taamaakkaluartoq tamanna borgmesterip Charlotte Ludvigsenip nakeriallaatiginagu nuannaaqaluni Nuummi qatseritaasivissap inissisimaffissaani nivariaqqaarpoq. Pilersaarutit malillugit 2022-mi maajip aallaqqaataani qatserutaasivik naammassineqarsimassaaq.

Borgmesterip, qatserisartut sanatitsisullu Nuuk City Developmentiminngaanneersut nivariaqqaartoqarnerani nuannaarnerat malunnaqaaq.

Borgmesteri oqalugiarami Nuummi qatserisartut nersualaarpai, tamanna qatserisartut innuttaasut illersorniarlugit uloriarsinnaasunik suliaqartarnerannit aallaaveqarpoq. Qatserutaasiviullu inissisimaffissaata pingaaruteqassusaa aamma eqqaava, qatserisartummi innuttaasunut tamanut sukkasuumik apuussinnaanerat pingaaruteqarpoq, aamma illoqarfiup immikkoortortassaata Siorarsiorfik eqqarsaatigalugu.

Borgmesterip oqalugiarnerata saniatigut NCD-mi pisortaanerup Jens B. Frederiksenip oqaatigaa, sanaartorneq NCD-mit qanimut malinnaaffigineqassasoq. ”MT Højgaardip neriorsuutitik malillugit sanaartornersut takusinnaassagatsigu.” NCD-mi pisortaaneq Jens B. Frederiksen qungujuutigaluni tusarnaartunut illariartunut taama oqarpoq.

Qatserutaasivik 2800 kvadratmeterinit annertunerusoq marlunnik qulereeqartussaq atorneqarnissaanut piareerpat, pitsaasunik sulisunut immikkoortortaqassaaq, garageqassaaq, biilinik asaasarfeqassaaq bilileriffeqassallunilu. Taamaasilluni qatserisartut pingaaruteqaqisumik sulinerannut atugassarititaasut pitsaalluinnartut pilersinneqassallutik.