Sisamanngornermiit “Toqqissisimanissaq pillugu angalaaqatigiit” marluk Nuummi Nuussuarmilu takussaalissapput. Angalaaqatigiit tassaassapput inuusuttunik siunnersuisartut marluk, taakkulu inuusuttut unnukkut illoqarfimmi aneertut attaveqarfigisarnissaat suliassarissavaat.
Inuusuttut sooq aqqusinermeerujuuginnartarnersut sulisunit misissuiffigineqassaaq peqataanillu taakkununnga sunik neqerooruteqarnersoq ilisimatitsissutigisassallugu. Tamatuma saniatigut angerlaassisinnaapput, imaluunniit angerlarsimaffiat toqqissisimananngippat sullissisumut attaveqarsinnaallutik.
”Meerartatta unnukkut isumannartumik silamiittarnerat akuerisinnaanngilara. Taamaammat aalajangerpunga Meeqqanut Atuarfeqarnermullu Ingerlatsivimmi sulisut sapaatit-akunnerini tulliuttuni inuusuttut sumiiffigisartagaanniittassasut, ullunilu makkunani saassussisarnerit taamaaliornikkut pinaveersaartinniarneqassallutik,” Kommuneqarfik Sermersuumi borgmesteri, Charlotte Ludvigsen, oqarpoq.
Toqqissisimanissaq pillugu angalaaqatigiit kommunimi meeqqanut inuusuttunullu neqerooruterpassuusunut ilassutaagallartutut isigineqassapput.
”Kommuneqarfik Sermersooq inuusuttunut atugarliortunut arlalinnik neqerooruteqarpoq. Aqqusinermi sullissisartut, inuusuttunik siunnersuisartut aamma inuusuttunik siunnersuisarfik ilaatigut tamakkuupput neqeroorutaasut. Ajoraluartumik neqeroorutivut tamarmik sullitatsinnut tamanut anngussimanngillat. Neriuppunga toqqissisimanissaq pillugu angalaaqatigiit inuusuttortavut attaveqarfigisinnaagaat,” Charlotte Ludvigsen oqarpoq.
Charlotte Ludvigsenittaaq politiit oqaloqatiginissaannut ataatsimeeqatiserivai, ilaatigut meeqqat akornanni persuttaasarneq ataatsimut akiornissaa eqqartorneqassalluni.
”Nuuk kikkunnut tamanut toqqissisimanartuussaaq, tamannalu uanga anguniarusuppara, kisianni suliassaq kommunip kisimi kivissinnaanngilaa,” Charlotte Ludvigsen oqarpoq.