Services

Utoqqaat ukiortaarsiortinneqartut

Pisarneq malillugu Tasiilami Najukkami Ataatsimiititaliap aaqqissuussaanik illoqarfiup utoqqartaat ukiortaarsiortinneqarput.

Ataasinngornermi januaarip ulluisa 18-ianni Tasiilami utoqqarnut nuannisarfiuvoq. Ukiortaarsiornissamummi qaaqqusaasimapput. Najukkami Ataatsimiititaliami siulittaasoq Ole Jens Lundblad utoqqarnut tikilluaqqusisuuvoq.

Panertut, ammassaat, puisip orsua, kinguppaat uiluillu nereqatigiinnermi sassaalliutigineqarpoq. Eqqaaneqareersut saniatigut aamma sava siataq kiisalu nersussuaq siataq assigiinngitsorpassuarneq ilallugit sassaalliutigineqarput. Nerereernerup kingorna kaffe thelu aammalu kaagit mamakujuttullu qaarsilaarujuussutigineqarput.

Borgmesterip tullersortaata aappaa Harald Bianco utoqqarnut oqalugiarpoq. Taassuma kingorna Kangiata akisuneraniit erinarsoqatigiittoqariarluni aliikkusersuisoqarpoq. Erinarsoqatigiit nipilersukkanik atuillutik qititsitsipput.

“Unnussiuaarnerput nuanneqaaq, peqataasunit nuannersunik akunniliillattaasoqarpoq, ilaatigut tissinartunik oqaluttuaqattaarlutik, pinnatassanillu pissarsilaarlutik. Utoqqaat oqaluttuanut qitutsiliivillutik illaqaat. Unnussiuaarnerput erinarsoqatigiinnermik naggaserneqarpoq, utoqqaat nuannisarsimallutik unnersiorput,” Najukkami Ataatsimiititaliami siulittaasoq Ole Jens Lundblad taama oqaluttuarpoq.