Services

Timersortartut Ulluat 2021: Assit takukkit

Pisarneq malillugu ullumi januaarip ulluisa arfernani, Kunngit Pingasut Ulluanni, timersortartut nersorniarneqarput.

Ukioq 2020 kulturikkut timersornermullu aaqqissuussat coronap ajornartoortitsineranit eqqornerlunneqarlutik unitsiinnarneqartut amerlagaluarlutik, aaqqissuussinerit ilaat iluatsissinnaasimapput. Naak unammiuaarnerit amerlasuut unitsiinnarneqaraluartut timersortartut peqatigiiffii sungiusarnerit nalinginnaasut ingerlatiinnarpaat.

Katersuussinnaanermut killilersuisoqaraluartoq timersortartut ullumi Katuami Hans Lynge Inersuaani nersorniarneqarmata nuannattoqarpoq. Kommunalbestyrelsemi ilaasortaat ilaat nersornaatinik agguaasussatut najuupput, agguaanerillu nipilersornermik akunnilerneqartarlutik. Tassani nipilersoqatigiit Liima Trio akunniliisuusarput. Nersornaasiinerit sisamaapput; Timersullammak, Maligassiuisoq, Suliniuteqarluartoq kiisalu Immikkut nersorusutaq.

Nersornaasiinermut tunngavilersuutit uani atuarsinnaavatit.

Timersullammak – Kim Ujarak Lorentzen

Kim Ujarak Lorentzen ukioq 2016-miit Nunatsinni nukittunerpaajuvoq. Sulili angusaqarnerujumalluni sungiusarneq nerisaminillu nakkutiginneqqissaarneq aalluppai. Killiffik annertooq oktoberip 24-at 2020 anguaa kivitseriaatsimi dødløftimi naalagaaffeqatigiinnermi oqimaannerpaamik kivitsigami 401 kilo kivillugu.

Tamannali naammaginagu suli angusaqarnerunissaminik anguniagaqarluni sungiusarpoq.

Maligassiuisoq – Uiloq Mathæussen

Uiloq Mathæussen, Runderful Nuuk. Nunatta avataani najugaqarnermini misilittakkat katersani atorlugit Runderful Nuuk aallarnerpaa suliniullu suli annertusiartorpoq. Timimik aalatitsinerulernissamik siunertamut naapertuuppoq. Nuummiinnaanngitsoq aammali sineriammi suliniut siammarterpaa. Illoqarfik Nuuk kusanartumik taamaasilluni nittarsaappaa.

Suliniuteqarluartoq – Allan Juhl

Allan Juhl timigissartarfimmik Fitnessgl-mik piginnittutut nukittuneqqusaattarnermik aallarniisuuvoq. Tamanna 2016-mi aallarnerpaa.

Ukioq 2020 corona pissutigalugu allaanerulluinnarpoq. Kommuneqarfiit killeqarfii akimorlugit peqataaffigineqartunik unammersuartoqarsinnaanngikkallarpoq. Tamannali aporfiginagu nukittuneqqusaanneq Greenland Strongest 2020 pilersaarusiorpaa. Peqataasut Ilulissaniit, Nuummiit Københavnimiillu unammeqataapput. Periuseq eqiiallatsitsimmat timersuutit allat assigusumik aaqqissuussinissamik pilersaarusiorput.

Immikkut Nersorusutaq – Rebekka Olsvig

Rebekka Olsvig, nammineq piumassutsiminik Red barnet sinnerlugu arfininngornikkut meeqqanik sulorartitsisarpoq. Tassani siunertaavoq pissakinnerit meerartaasa timersornissamut periarfissinneqarnissaat.

Rebekka Olsvig maanna ukioqqortusigaluarluni timersoqataalluni meeqqanik sulorartitsisarpoq. Suliaq nuannarilluakkani maanna ukiuni arlaqartuni ingerlappaa.

Aaqqissuussap aallakaatinneqarnera uani takuuk