Nuummi Eqqumiitsulianik Saqqummersitsivik ”Og hustru // Nulialo” qulequtaralugu saqqummersitsissaaq. Arnat eqqumiitsuliortut pingasut pillugit saqqummersitsineruvoq. Taakku 1900-p 1940-llu akornanni uitik ilagalugit Kalaallit Nunaannut aallarsimapput. Saqqummersitsineq februaarip sisamaaniit martsip 21-ata tungaanut ingerlassaaq.
Christine Deichmann, Oda Isbrand aamma Ellen Locher Thalbitzer tamarmik eqqumiitsuliortuupput. Angutit ilisimasassarsiunngikkunik anguniagaqarlutik Kalaallit Nunaanniittarsimapput. Arnat angalaqataasuupput, uimisulli Kalaallit Nunaanni pisussaaffeqaratik. Angutinit eqqumiitsuliortunit Kalaallit Nunaat allaanerusumik qalipattarsimavaat. Takusaat allaaneruvoq, qalipagaallu allaanerullutik. Arnat pingasut arnat meeqqallu qalipannaagarisimavaat.
Pingasuullutik uimik tunuanni malunnarpallaaratik pisimapput, suut tamaasa avataanniillutik, puiorneqartutut illutik, arnaanertik pissutigalugu. Pingasuullutik naliminni eqqumiitsuliornerup silarsuaanut ilaasimapput. Arnat pingasut eqqumiitsuliaannik saqqummersitsineq nuliatut angalaqataaginnaratik pisimanerannik ersersitsissaaq. Piffissami arnat eqqumiitsuliortutuunngitsoq, katittussassiaannartut, angerlarsimaffimmik meeqqanillu paarsisussatuinnaq isigineqarfiata nalaanni pimoorussillutik pikkorissuseqarlutillu naliminni eqqumiitsuliortuunerannik ersersitsissaaq.
Saqqummersitsinermi aamma eqqumiitsuliortut taakkua pingasut saniatigut eqqumiitsuliornikkut oqaluttuarisaanermi 1940-kkut sioqqullugit kalaallit arnat eqqumiitsuliornikkut takussaasimannginnerat ersersinniarneqarpoq. Aalut Kangermiu arnamik nalissarsineqarsimanngilaq. Arnat assassortarnermigut kusanartulianut, sapangaaqqanik nuisanut kalaallisuuliornermilu ilaapput, suliaannulli aqqi nalunaarsorneqarsimanngillat; mannamut suli oqaluttuarisaanermi puigugaaqqapput.
Saqqummersitsineq februaarip sisamaani nal. 17 Nuummi Eqqumiitsulianik Saqqummersitsivimmi aammarneqassaaq.