Services

Inussuttunik Sullissiviugallartoq pulaarneqarpoq

Marlunngornermi januaarip ulluisa 19-ianni borgmesterip tullersortaata aappaa Tasiilami Inuusuttunik Sullissiviugallartoq pulaarpaa.

Tasiilami Inuusuttunik Sullissivik januaarip aallaqqaatani ammarneqarpoq, taanna utaqqiisaagallartumik qimarnguimmi inissisimavoq. Inuusuttunik Sullissivik ulluinnarni qanoq ingerlariuseqarnersoq Harald Biancop paasiniaaffigaa.

”Isumalluartupilussuuvunga, Inussuttunik Sullissivik nutaaq alakkarsinnaagakku nuannaarpunga. Aallartilluarsimapput siunissamullu isumalluarpunga”, Harald Bianco taama oqaluttuarpoq.

Immikkoortortami aqutsisoq Jakob Noahsen aamma fagchefi Nielsine Petersen takornariartitsisuupput, tassani immikkoortortani assigiinngitsuni sulliviillu qanoq ataqatigiissaarneqartarnersut oqaluttuaraat. Tasiilami meeqqanik ilaqutariinnillu siunissami suliniutaasussat eqqartorneqarputtaaq.

Sapaatip akunnerata tulliani Inuusuttunik Sullissivik illumut nutaamut nutsernissaat pilersaarutaavoq.

Harald Bianco meeqqat angerlarsimaffiat Prinsesse Margrethe aamma pulaarpaa, tassani pisortaagallartoq Mitdlaraq Motzfeldt Olsen takornariartitsisuulluni.