Kommuneqarfik Sermersuumi innuttaasut suliffeqarfiillu eqqagassanik passussinermut igitsinermullu tunngatillugu pisussaaffiminnik eqquutsitsinissaat eqqagassanut malittarisassat nutaat ajornannginnerulersissavaat.
Eqqagassanut malittarisassat nutaat atuisunut naleqqussagaapput. Malittarisassat kingulliit marluk suliffeqarfinnut innuttaasunullu atuuttut ataatsimut malittarisassanngortinneqarput. Malittarisassiat nutaat sukumiinerupput siuliinullu sanilliullugit ”eqqakkat pillugit immikkoortuliat” amerlanerullutik. Eqqakkat pingaarnertut immikkoortitikkat aalajangersimanerusumik immikkoortiterneqarnerinik tamanna isumaqarpoq
Avatangiisinut tulluarnerusumik eqqakkap passunneqartarnissaannut kommunip periarfissaasa pitsanngorsarnissaat tamatumunnga siunertaavoq. Eqqagassanut malittarisassat nutaat kommunip eqqakkanik pilersitsisartunut annertunerusumik piumasaqaateqarsinnaalernissaanut periarfissiipput, taamaalinikkullu mingutsitsisorpiaat saliinermut akiliisartussanngornissaat siusinnerusumit annertunerusumik isumagineqalissaaq. Taamatuttaaq eqqagassanut malittarisassat nutaat innuttaasunut inuussutissarsiortunullu atuaruminarnerussapput taamaalillunilu eqqakkanik eqqortumik igitsinissaq ajornannginnerulissalluni.
Piujuaannartitsineq Naalagaaffiillu Peqatigiit nunarsuarmut anguniagaat Kommuneqarfik Sermersuumi annertuumik pingaartinneqarput, eqqagassalerinerlu suliassaqarfiit piviusorsiortumik allannguuteqarfigisinnaasatta ilagaat.
”Kommunimi annertuumik angusaqareerpugut, innuttaasut inuussutissarsiortullu eqqagassanik immikkoortiterisarnerat annertusiartorpoq. Atoqqiisarnitsinnut procentit ukiuni kingullerni qaffariapiloorsimanerat takusinnaagatsigu pitsaasupilussuuvoq”, avatangiisinut pisortaq Frank Rasmussen oqaluttuarpoq.
Annermik sanaartornermi atortussanik nutaanik malittarisassatoqqani ilaanngitsunik takkuttoqarsimasoq aammattaaq nassuiaavoq. Taamaattumik eqqakkanik tigooraaviup eqqagassanut malittarisassat annertuumik nutarterneqarnissaat pisariaqartissimavaa.