Services

Orpiliarujussuaq takuiuk?

Nuummi sumiikkaluaruilluunniit arsaattarfiup qulaatunginnguani qaqqami orpiliarujussuaq qorsuk takusinnaavat.

Ukioq manna Covid-19 allannguilaavinnikuunera pillugu Nuummi orpiup ikinnissaanut allatut isumassarsiortoqartariaqarsimavoq. Kommuneqarfik Sermersooq Tele-Post suleqatigalugu orpiliarujussuarmik Nuummi innuttaasut alutorsaatigisinnaasaannik annertuumik katersuuttoqarnissaa pinaveersaarniarlugu ikkussivoq.

”Nuummi orpiup ikinneqarnerata innutaasunit tamanit takuneqarnissaa nuannersumillu misigineqarnissaa kissaatigaarput, Coronali pillugu malittarisassanik silami katerinnermi inuit amerlanerpaamik 250-iusinnaaneranik malinninnissatsinnut pisussaaffeqarpugut. Taamaattumik allatut eqqarsarnikkut orpiliarujussuaq inunnit tamanit – angerlarsimaffimmiluunniit inimiit – takuneqarsinnaasoq ikkunneqarpoq. Juullip nalaaniugaluartorluunniit immitsinnut paarinissarput eqqaamassavarput”, Borgmesteri Charlotte Ludvigsen oqarpoq.

Orpiliarujussuaq qaamasoq qorsummik qalipaatilik Qinngutsinniit, Nuussuarmiit Qaqortumiillu (Myggedalen) takuneqarsinnaavoq.