Services

Nuummi sullorsualiornissaq qallivoq

Nuussuarmi sullorsuaq allineqassaaq, tamatumalu saniatigut illoqarfiup immikkoortussaata Siorarsiorfiup tungaanut nutaamik sullorsualiortoqassalluni. Suliffeqarfiit sorliit suliassamik taama angitigisumik naammassinnissinnaanersut nalilersussallugit maanna piffissanngorpoq, taamaaliortoqassaarlu piukkunnartussarsiorluni suliariumannittussarsiuussinikkut, ilaatigut qinnuteqarnissamut 9. februaarimut killeqartumi.

Siorarsiorfik – Nuuk City Development A/S Nuummi marlunnik sullorsualiornissamut atatillugu suliarinnissinnaasunik nalilersuinissamut tamanut piukkunnartussarsiorluni suliariumannittussarsiuussivoq.

”Pilersaarummi suliarineqassapput sullorsuup pioreersup amutsiviup angallatinullu nuannaariutinut puttasut akornanniittup allilerneqarnissaa kiisalu Mitsimmavimmiit illoqarfiup immikkoortussaata Siorarsiorfiup akornanni sullorsuassaq”, NCD-mi pisortaaneq, Jens B. Frederiksen, oqarpoq.

Piukkunnartussarsiornermi suliariumannittussarsiuussinermi suliffeqarfiit qinnuteqarnissaannut 2021-mi februaarip ulluisa qulingiluaat killigitinneqartoq ilisimatitsissutigaa, aamma ingerlatseqatigiiffiit sorliit toqqarneqarsimanersut ulloq 15. februaari 2021-mi NCD-mit nalunaarutigineqarumaartoq. Piukkunnartussarsiorluni suliariumannittussarsiuussinermi nalilersuineq naammassereerpat suliffeqarfiit neqeroortitsinermut atortussat tigussavaat, pilersaarutillu malillugit suliariumannittussarsiuussineq 6. apriili 2021-mi pissaaq.

Sanaartugassani marlunni makku sanaartorneqassapput:

  • Aqqusinermi ingerlavissat marluk cykelinullu/pisuinnarnullu aqqut immikkoortoq
  • Imermut sermimullu qularnaarut
  • Ledningit pilersuinermut atortut
  • Isaarissat betoninik sanaat marluk
  • Qullersuit sullorsuarmullu atortussalersuutit 

Annertunerusumik paasisaqarniaraanni Jens B. Frederiksen oqarasuaammut uunga sianerfigalugu, 499595 attavigineqarsinnaavoq.