Services

Maanngaannaq eqqaasarneq pillugu annertunerusumik qitiutitsineq

Qassutikut akornannut eqqaaneq inerteqqutaavoq, igitsisoqassappallu eqqaasoq siunissami aalisarnermi atortukuni igitsiniarnerminik akisunaarisinnavoq.

Kommuneqarfik Sermersooq inuussutissarsiornermut tunngasunut akuersaartuuvoq, taamaattumillu Sermersuumi Eqqakkanik Tigooraaviup inuussutissarsiortut assigiinngitsut atorunnaakkanik igitsisarnissaasa akikinnerulernissaat qulakkeerniarlugu arlalinnik suliniuteqarnissaa pissusissamisoortuuvoq.

Aalisarnermi inuussutissarsiornerup iluani aalisartunut piniartunullu qassutikunik, ningittakkanik qalorsuarnillu atorunnaarnikunik tunniusinerup akikitsuunissaa suliniutit ilaanniippoq. Aalisariutinik atorunnaartunik Eqqakkanik Tigooraavimmut 1 tonimut tunniussinermut akigititaasut 180 koruunimut apparput. – Igitassalli immikkoortinneqareersimassapput, eqqagassanullu allanut akulerussimanatik.

 Qassutikut, ningittakkat qalorsuillu atorunnaarnikut Eqqakkanik Tigooraavimmukaanneqarsimasut Danmarkimut atoqqitassanngortussanngorlugit nassiunneqartarput. Tassani salinneqaqqaartarput mikisuaranngortinneqarlutillu, kingornalu plastikkiliarineqarlutik soorlu pisattat issiaviillu.

Nuummi Eqqakkanik Tigooraavimmi eqqakkat akornanni qassutikunik, ningittagakunik qalorsuarnillu atorunnaarnikunik  siumuisoqartarpoq.

”Eqqakkat allat aalisarnermi atortukut akornaniittassanngillat. Immikkoortinneqartassapput isumannaatsumillu iginneqartassallutik. Eqqagassat allat aalisarnermi atortukut akornannut iginneratigut atoqqiinissamut aningaasartuutit qaffarujussuarsinnaapput, taakkulu aningaasartuutit akileraartartumut tuttussanngortussaallutik,” Avatangiisinut pisortaq Frank Rasmussen nassuiaavoq.

Eqqakkanik Tigooraavik massakkut aalisarmi atortukut tunniunneqartut nalunaarsornerisigut aaqqiissummik suliniuteqarpoq, taamaasillutik aalisarnermi atortukut akornanni asuliinnaq eqqaasoqarsimatillugu eqqaasoq ingerlaannaq paasineqarsinnaaniassammat. Taamaattoqarsimatillugu eqqaasoq Eqqakkanik Tigooraaviup suliarinninnerata qaavatigut aningaasartuutit nalinganut akiligassinneqassaaq. 

”Nammineq eqqakkanik isumaginnikkumannginneq akisussaaffimmik qimarratiginninneruvoq. Tamakku eqqakkanik tigoorravimmiit piffissaajaatigisussaanngilagut. Aalisarnermi atortukut eqqakkanit allanit immikkoortinneqareersimasut tigusartussaavagut, atoqqinneqarsinnaanissaallu sapinngisatsinnik qulakkeerniarsaralugu”, Avatangiisinut pisortaq Frank Rasmussen nassuiaavoq.

Sermiligaami qassutit qimaannakkat qaqinneqartut

Asimi qassutit qimaannakkat isigiuminaattaqaat, uumasunillu ulorianartorsiortitsisinnaallutik. Taamaattumik ukioq manna Kommuneqarfik Sermersuumi Kommunalbestyrelse Sermiligaami qassutinik qimaannakkanik piiaasoqarnissaanut aningaasaliivoq. Tassanilu qassutit ningittakkallu 2,5 tonsit missaat qaqinneqarput. Taakkulu maanna Sermersuumi Eqqakkanik Tigooraavimmiit atoqqitassanngorlugit aserortiinnagassanngorlugilluunniit suliarineqarput.