Services

Kangillinnguit Atuarfianni Coronartoqanngilaq

Kangillinnguit Atuarfianni atuartoq Rigshospitalimut marlunngornermi unnukkut tikinnermini Coronamik tunillatsissimasoq Kangillinnguit Atuarfianni atuarfiup pisortaa aamma Meeqqanut Atuarfeqarnermullu Ingerlatsivik pingasunngornermi ullaakkut nalunaarfigineqarput. Kingunerani qujanartumik misissuineq eqqunngitsumik inerneqarsimasoq paasineqarpoq. Tassa imaappoq atuartoq Coronamik tunillatsissimanngilaq.

Nalunaarut taama ittoq ingerlatsivimmut atuarfimmullu anngunneqaraangat upalungaarsimaneq aallartittarpoq. Atuartup pineqartup kiisalu qatanngutaasa klassiini atuartut angerlassasut misissortissasullu oqartussanit – pisumi matumani politiinit – nalunaarfigineqarput. Klassimi ilinniartitsisut ingerlatsivimmit ilanngunneqarputtaaq. Angajoqqaat ilinniartitsisullu angerlarsimaffimminnit aninnginnerini pissarsiaripallannissaat pingaaruteqarsimavoq. Tamannalu pingaartinneqarnerpaatut isigineqarpoq. Tamatuma saniatigut apeqqutissaqartoqassappat akissuteqarfigineqarniassammata klassit taakku marluk atuarfimmit pisoq pillugu allaffigineqarput.

Coronamilli tunillatsittoqarsimasinnaaneranik nutaarsiassaq tusagassiortunut ingerlateqqipallanneqarsimavoq, kingunerisaanillu klassini allani atuartut angajoqqaavi atuarfimmut saaffiginnillutillu meeqqaminnik aallertarsimapput.

Klassilli marluk eqqorneqartut angerlartinniarneranni mianersortumik tunngaveqarluni ingerlatsisoqarsimasoq piffissamilu tamatumani klassit allat angerlartinnissaannut atuarfiulluunniit matunissaanut peqqutissaqarsimanngitsoq erseqqissaatigissavarput. Taamatuttaaq kingullertut taaneqartoq atuarfiup pisortaanit ingerlatsivimmiilluunniit atorneqartussaanngilaq Nunattali Nakorsaaneranit aalajangiunneqassalluni.

Atuartoq tunillatsissimanngimmat, pisup pitsaasumik inerneqarnera nuannaarutigaarput. Taamaammat sisamanngornermit decembarip ulluisa 17-iannit nalinginnaasumik atuartitsineq aallarteqqissaaq.

Pisumili tunillaassuuttoqaratarsinnaasoq oqartussallu innersuussuteqartarnerisut tamatta inuttut akisussaaqataassasugut paasiinnarparput.