Services

Ilungersuussilluartut tamarmik nersorneqarsimalerput

Gedion Ignatiussen ataasinngornermi novembarip ulluisa 30-anni ukioq manna Ilungersuussilluartutut nersorniarneqarpoq. Kommunalbestyrelsemi ilaasortaq Harald Bianco nersornaammik tunniussisuuvoq.

 Sapaatip akunnera kingullermi Anders Meilvang aamma Røde Korsip Nuummi pisiniarfia borgmesterimit Charlotte Ludvigsenimit nersorniarneqarput. Aaqqissuussami aamma Gedion Ignatiussen Tasiilameersoq Ilungersuussilluartutut toqqarneqarsimasoq avammut suaarutigineqarpoq.

Gedion Ignatiusseni 2016-miilli “Qiimmassarfik” katersortarfimmi ingerlanneqartartoq aaqqissuuttalersimavaa. Qiimmassarfik akissarsiffimmi imigassartaqanngitsumik aaqqissuunneqartarpoq. Aaqqissuussarlu aliikkusersuinermik, pitsaaliuinermut tunngasunik kiisalu inuiaqatigiinni ajornartorsiutaalersartut, soorlu serlersaarinerit tillinniarnerillu pillugit oqallinnernik imaqartarluni.

“Ilungersuussilluartup Tasiilami ataatsimoornerulersitsisuuvoq, aliikkusersuutigalunilu pissarsiaqarnartumik ataatsimoorfeqarnissamik periarfissaqartitsisarluni. Taamaattumik ukioq manna 2020-mi ilungersuussilluartoq nuannaarutigeqalugu pilluaqqorujussuassavara – Gedion Ignatiussen,” Charlotte Ludvigsen oqalugiarnermi ilaatigut taama oqarpoq.

Gedion Ignatiussen erinarsoqatigiit peqatigalugit Tasiilap nunaqarfiinut angalanissaa pilersaarutaasimagaluarpoq, tassani nunaqarfinni Qiimmassarfimmik assingusumik pilersitsinissaannut Gedion Ignatiussen isummersuiartornissaa siunertaasimagaluarluni. Coronali peqqutigalugu killilersuisoqarnerata kinguneranik tamanna pisinnaasimanngilaq, Gedion Ignatiussenili neriuppoq aasaru nunaqarfiit tikissinnaassallugit.

“Qaqugu Qiimmassarfeqaqqissanersut pillugu suli saaffigineqartarpunga. Tamanna pisiariaqartinneqartoq takutiinnarpaa, taammaattoqarneralu suleriaqqinnissannut nukissannik tunisivoq. Ilungersuussilluartutut toqqaneqarnera tulluusimaarutigeqaara,” Gedion Ignatiussen taama oqarpoq.

Uani Gedion Ignatiussen nulia meeraallu takuneqarsinnaapput.