Services

Asasatit tunillannaveersaakkit

Piffissaq nuannisaarfiusussaq qanigisatsinnillu peqateqarfiusussaq qanillivoq. Piffissaq asasatsinnik ataatsimooqateqarfissarput. Taamaattumik – taakku pillugit – qanillinaveersaarnissaq eqqaamajuk.

Corona nunarsuaq tamakkerlugu atuukkaluartoq inuillu hundredetusindilikkaat toqusimagaluartut uagut Kalaallit Nunaanni maluginngingajassimavarput. Massakkumut.

Kalaallit Nunaata nunarsuullu sinnerata akornanni Juullip angallaffiusarnera nunarsuarmioqataanerup ilagaa, Kommuneqarfik Sermersuullu illoqarfii nunaqarfiilu tamarmik angalasunut amerlaqisunut apuuffissaasarput.

Angalasorpassuit juullerpalaarnermik taskinillu poortukkanik ulikkaartunik nassartut ilagalugit juullilernerata coronamik tunillatsissimasunik marlunnik kisitsisitalinnik Kalaallit Nunaannut tikisitsinissaa Nunatsinni Nakorsaanerup ilimagaa.

”Imminnut isumassornissatsinnut piffissanngorpoq Peqqikkaluaruit coronavirusilu ersiginagu, allat mianerisariallit eqqarsaatigissavatit. Nunatsinni iluatsitsisimavugut. Nunarsuaq tamakkerlugu tunillaassuunnersuarmi ilaquttatsinnik ikinngutitsinnillu toqusunik takusaqanngilagut. Tamannarpiarlu pissutigalugu suli mianersortariaqarpugut: Asasatta tunillannginnissaat sapinngisarput tamaat atorlugu anguniassavarput,” borgmester Charlotte Ludvigsen oqarpoq.

Kommuneqarfik Sermersuup innuttaasut suli mianersornissatsinnik eqqaasinniarlugit ilaatigut paasititsiniaasarsimavoq, saqqarmiuliorluni allagartarsualiorlunilu. Pisiniartilluta bussertillutalu qanillinaveersaartassaagut kiisalu eqitaarinerit assammittarnerlu unitsinneqaqqissapput Pingaarnerpaavorlu kikkut tamarmik akulikitsumik assatik assattassammatigit, eqqiluissaarnissarlu eqqumaffigeqqissaarlugu.

”Nunarsuaq tamakkerlugu tunillaassuuttumik akiuisimanerput nunatut tulluusimaarutigissavarput. Nunarpassuit uatsitullu angitigisut sakkortuumik eqqugaasimapput nunarpulli Coronaqartissimanngilarput. Akiuussutissap pissarsiarinissaa taamatut qanitsigitillugu pinaveersaartinniassavarput” Charlotte Ludvigsen oqarpoq. 

Inuiaqatigiittut misiginneqatiginninnerpit takutinnissaa eqqaamajuk, qanillinaveersaarnissat eqqaamajuk asasavillu paarinissaat aamma eqqaamajuk. Taamaalilluta tamatta juullisiorluarlutalu ukiortaamut iserluassaagut.