Services

Paamiut: Imminut toqunnissamik akiuiniarnermi innuttaasut pikkorissarneqarput

Oktobarip ulluisa 22-ani 23-anilu Paamiuni innuttaasut imminut toqunnissamik eqqarsaateqartunut qanoq ikiuisoqarsinnaaneranik kiisalu imminut toqunnermik qimagaasimaasunik oqaloqatiginnittariaatsimik pikkorissaasoqarpoq. Pikkorissarnermi peqataasorpassuupput, innuttaasunik sulissinermik suliaqartut aammalu suliffeqarfiit arlaqartut pikkorissaanermi peqataapput.

 

Paamiuni pitsaaliuinermi siunnersorti Augustine Rosingip aaqqissuussaanik, imminut toquttarnermik akiuiniarneq ingerlanneqarpoq, tassani imminut toqunissamik eqqarsaateqartunut qimagaasimasunullu oqaloqatiginneriaatsimik pikkorissaasartoq Kirstine Davidsen pikkorissaajortorluni Paamiuniippoq.

”Politiit nalunaarutaat malillugu 2019-imi inuit imminut toqunniarlutik siorasaarisut 800 sinneqarput, tamannalu takutippaa inuiaqatigiit kivitseqatigiinnissarput piffissanngortoq,” Paamiuni pitsaaliuinermi siunnersorti Augustine Rosing oqarpoq.

Inuiaqatigiit pisortanik isumalluuteqaannaratik, inunnut artorsaateqartunut imminullu toqunissamik eqqarsaateqartunik oqaloqtiginninnermikkut imminut toqunissamik eqqarsaareqartut qaffasissumik uloriarnartorsiorneranniit appasissumut inissiisinnaanermik aqqutissiuisinnaanngornissaq pikkorissarnermi siunnertarineqartoq Augustine Rosingip oqaatigaa

Pikkorissaanermi innuttaasunik sullissinermik suliaqartut suliffeqarfinnillu assigiinngitsuni sulisut pikkorissaneqartut 26-upput.

Meeqqat inuusuttullu oqalugiarfigineqarput

Suliffeqarfinniit sulisunik pikkorissaanerit saniatigut Atuarfik Tuiisami 8-9-10 klasseni atuartut, Majoriami Piorsaavimmilu ilinniartut imminut toquttarnermik kiisalu imminut toqunnerup kingunerisaanik qimagaasarneq pillugu oqalugiarfigai. Atuartunut ilinniartunullu oqalugiartoqarnera inuit 50 sinnerlugit peqataapput.

”Meeqqat atuarfianni atuartut annerit kiisalu ilinniartut qulaani taaneqartut, akunnerni marlunni oqalugiarfigineqarneranni, periutsinik assigiinngitsunik aamma saqqummiivigineqarput, pissarsiaqaataalluartumillu naammassineqarluni,” Augustine Rosing oqarpoq.

Suliffeqarfiit periusissiamik pilersitsinissaat kaammattuutigineqarpoq

Pikkorissaasup Kirstine Davidsenip suliffeqarfinnut kaammattuutigaa suleqatigiit iliuusissamik pilersaarusiornissamik oqariartuuteqarfigai.

”Tassani imminut toqukkusuttumik imaluunniit artorsaateqartumik naammattuuitillutik qanoq periuseqarnissaminnik takussutissaqalerniassammat, taamaalillutik ulluinnarni qanoq periuseqariasaarsinnaaneq ataavartumik ilisimasaqarfigilersinnaaniassammassuk,” Kirstine Davidsen taama oqarpoq.

Aamma taamatorluinnaq atuartut ilinniartitsisullu kaammattorneqarput klasseminni qanoq periuseqarsinnaanerlutik pilersaarusiussagaat, iliusissatut pilersaarut eqqarsaatigalugu.

Pikkorissarnermi sammineqartut quleqquttat assigiinngitsut sammineqarput, ilaatigut imminut toquttarneq pillugu isummertarneq, tassani peqataasut tamarmiullutik immikkut qanoq imminut toqunnissamik eqqarsaateqartutnut isiginnittaaseqalersinneqarput, imminut toqunniartumik eqqarsaateqartumut qanoq periuseqarluni ikiorsiigasuarnissaaneq ilinniarneqarluni.

Aamma uloriarnartorsiortoqartillugu naliliisinnaaneq ilinniarneqarpoq, tassani pikkorissaqataasut imminut toqunnissamik uloriarnartorsiortunik qanoq naliliisinnaanerat, qanoq ilisukkut pisortanut ingerlatitseqqissappat aammalu qanoq ilisukkut nammineq iliuuseqarsinnaaneq ilinniartitsissutigineqarluni.