Innuttaasunut

Nuuk siullersaalluni piujuaannartitsinissamik tunngavilittut allagartalik

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ullumikkut Kommuneqarfik Sermersuup uppernarsaatit arlaqartut siulliannik tigusaqarnini nalliuttorsiutigaa, tamanna Nuup piujuartitsinissamik tunngavilittut nalunaarutigalugu allagartartaarnissaanut pisariaqarpoq. Nuuk takornariaqarnermi piujuartitsineq tunngavigalugu orninneqarsinnaasutut ineriartortinneqarnissaa pillugu Kommuneqarfik Sermersooq suliniaqatigiiffimmit EarthCheck-imit siunnersorteqarluni pisussaaffeqalerpoq.

Kommuneqarfik Sermersuumit illoqarfiit pingaarnersaattut nunarsuarmi siullertut piujuartitsinermik tunngavilittut  allagartaqalernissaminut alloriarpoq. Uppernarsaat Diplom, kommunimit tiguneqartoq tassaavoq bronze benchmarking – imaluunniit assersuussinissamut tunngavik. Assersuussinissamut tunngaviusoq ukiumoortumik suliarineqartarpoq aamma kommune anguniakkaminik naammassinnissinnaaneranut aamma piujuartitsinermut tunngasunut pisussaaffinnik naammassinnissinnaaneranut naliliinermi aallaaviuvoq. Piffissap ingerlanerani kommunip ukiut siuliini nammineq angusat aamma nunarsuarmi orninneqarsinnaasut allat assersuussinnaalissavai.

Suliniaqatigiiffik EarthCheck suleqatigalugu kommune maannakkut ornigassatut angusaqarniarluni suliaqarpoq, taaneqartartoq Sustainable Destination. Tamanna imatut isumaqarpoq, kommune ungasinnerusoq isigalugu, piujuartitsinernut attuumassuteqartunut aaqqiissutinut najoqqutat qaffanneqassasut, soorlu pinngortitap kulturimillu kingornutat illersorneqarnissaanut aningaasaqarnikkut imminut nammassinnaasumik pinissaat.

Nalliuttorsiutiginninneq ullumi Hotel Hans Egedemi ingerlanneqarpoq, tassani inuussutissarsiuteqartunit suleqatigisat peqataapput. Ilasseqatigiinnermi nalunaarusiaq, bronze-mik allagartalerneqarnermut tunngaviusoq, Kommuneqarfik Sermersuumit saqqummiunneqassaaq.

– Nuummi imermik aammalumi innaallagissamik mingutsitsinngitsumik Nukissiorfinniit atuilluartuuvugut.  Pitsanngorsaatissalli allat suli utaqqipput, ikummatissanik atuinerput eqqarsaatigissagutsigu.  Ukiumoortumik tunngavissatut assersuusiortarneq unammilligassatsinnik tamanik paasisitsisarpoq, aamma sunik suliaqarluta aallartinnissatsinnik, Kommuneqarfik Sermersuumi siunnersorti Asmus Jessen Rubæk oqarpoq.

Siorna ukiup ingerlanerani Kommuneqarfik Sermersuumi GreenTeamit EarthCheck suleqatigaat, piujuartitsisumik suliniuteqarneq tunngavilerumallugu. Qaammatit siuliini inuussutissarsiuteqartut suliamut aamma akuliutsinneqarput, paasissutissat amerlanerpaartaat attuumassuteqartut, Bronze-mik allagartartaarnitsinnut tunngaviusut, namminersorlutik inuussutissarsiuteqartunit suleqatigisatsinneersuummata.

– EarthCheck-imi suliffeqarfiit, ataatsimoorussat aamma oqartussaqarfiit ikiortarpagut, nunarsuarmut inuussutissarsiornermullu iluaqutaasunik angusaqarniarnermi. Kommuneqarfik Sermersuup qanoq piujuartitsisumik angusaqarusussuseqarnerminik attassiinnarnera assorsuaq tupigusuutigaarput, naak tamatta nunarsuarmi tuniluuttumik nappaalasoqarnerata qeqqaniikkaluartugut. Allat malinnaajumaartut neriuutigivarput, André Russ oqarpoq, EarthCheck-imi tuniniaanermik Vice Præsident.

Nalliuttorsiorneq coronami killilersuutit tamaasa eqqarsaatigalugit ingerlanneqarpoq.