Innuttaasunut

Meeqqat siunnersuutitik tunniuppaat

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Aalajangersagaq aqqanilinnik innersuussutitalik tallimanngormat Nakuusami meeqqat isummersorfii atsiorlugulu tunniuppaat.

Aalajangersakkamik tunniussinermi meeqqat Aasianneersut, Ilulissaneersut, Qaqortumeersut Sisimiuneersullu Zoomikkut malinnaapput. Politikkerinik naapitsineq digitalilu atorlugu tunniussineq Kommuneqarfik Sermersuup koomunalbestyrelsiata ataatsimiittarfiani ingerlanneqarpoq.

Aalajangersagaq aqqanilinnik innersuussutitalik Naalakkersuisunut nunatsinnilu borgmesterit tallimaasunut tunniunneqarpoq.

Oktoberimi Nakuusap ataatsimeersuarnerani innersuussutit suliarineqarput, taakkulu maanna politikkerinut tunniunneqarsimalereerput.

Meeqqat suliarisimasaat pingaaruteqartut, kiisalu innersuussutit piviusunngortinneqarnissaat sulissutigissallugu Borgmesteri Charlotte Ludvigsen meeqqanut oqalugiarami oqaatigaa.

 Nakuusami meeqqat isummersorfiimi innersuussutigineqartut Kommuneqarfik Sermersuumiit aatsaat siullermiilluni malinneqalinngillat. Tunumi interneti pitsanngorsarniarlugu kommunimit 5 mio. koruunit aningaasaliissutigissallugit ilaatigut aalajangerneqarsimavoq.

”Ullumikkut pissangallunga oqartariaqarpunga. Aalajangersagaq suliarisimasarsi tiguara. Siunnersuutit pitsaasut atuassallugit pissanngatigaara,” Borgmesteri Charlotte Ludvigsen oqarpoq.

Innersuussutit ilaatigut kinaassutsimut, inuit nittartakkakkut naapittarfii kiisalu assigiinngisitaarnermik tunngassuteqarput.