Services

Ilungersuussilluartut nersorneqarput

Ukioq manna Ilungersuussilluartunut inunnut pingasunut borgmesteri Charlotte Ludvigsen nuannaangaarluni akissarsititsivoq. Toqqagaasut marluk najuupput ataaserlu najukkamini Tasiilami akissarsitinneqassalluni.

Nalunaaqutaq pingasut qaangilaarnerani kikkut Ilungersuussilluartutut toqqaagaanersut borgmesteri Charlotte Ludvigsenip avammut suaarutigaa. Ukioq mannami Ilungersuussilluartutut toqqarneqartut pingasuupput, taakkulu nammineq kajumissuseq atorlugu kusanartumik suliaqarsimanerat pillugu nersorniarneqarlutik.

Anders Meilvang, Gedion Ignatiussen kiisalu Kalaallit Røde Korsiata Nuummi pisiniarfia ukioq manna

Ilungersuussilluartutut imminut taasinnaanngorput.

”Ilungersuussilluartut ilaatigut ilisarnaatigisarpaat, nammineq kajumissutsiminnik allanngueqataallutik imminullu pinngikkaluarlutik inunnut allanut annertuumik sunniuteqartumik suliniuteqartartuunertik.

Ilungersuussilluartoq tassaavoq inuk inoqatiminut ajunngisaarusussuseqarnerminik ajunngitsuliortartoq. Allatut taama nersortariaqartigisumik nassaassaqarunanngilaq,” borgmesteri ilaatigut oqalugiaammini taama oqarpoq.

Uannut pinngilanga

Anders Meilvang Nunatsinni Inuit Innarluutillit Kattuffianni (NIIK) siulittaasoq siulliulluni nersunnaammik tunineqarpoq.

”Tamanit takuneqarnissara pillugu sulinngilanga. Inuit amerlasuut ajortumik atugaqartut ikiorusullugit suliaqarpunga. Ikiuitissimatillunga inuit qujallutik oqaraangata nalunarneq ajorpoq taakkunanut isumalimmik suliaqarlunga. Taamaattoqartillugu nuannaarujussuarnermik pisarpunga. Suliffimmi qasunartumik sulisinnaasarpugut nersualaarneqarnata, allalli ikiorlugit nuannaartikkaanni aamma uanga nammineq nuannaalertarpunga,” Anders Meilvang taama oqarpoq.

“Oqaqqammerpunga tamanit takuneqarnissara pillugu sulinngitsunga, taamaammat quianarpoq oqassallunga nuannaarlunga maluginiarneqarsimagama, inuimmi tamarmik nersorneqartillutik nuannaartarput. Tulluusimaqaanga, maliginiarneqarnera uannut isumaqaqaaq, tamanna aamma siunissami sulerusunnerulernermik nukissanik tunisivoq.

Kalaallit Røde Korsiat inoqammik ikiuinissaq pingaartippaa

Kommunalbetyrelsip ataatsimittarfiani arnat sisamat aappaluttunik ilisarnarluartunik vestillik najuupput, taakkulu kikkuunersut nalunanngilaq, tassa Kalaallit Røde Korsianeersut.

”Inoqammik ikiunissaq uagutsinnut pingaartupilussuuvoq. Ikiortariallik ikiorlugit. Pisiniarfitsinni sinneqartoorutit tamavimmik siunertanut pitsaasunut atorneqartarput. Soorlu sapaatit akunneranut ataasiarluta angerlarsimaffeqanngitsut kissartunik nerisaqartittarigut, Kofoedsskole angerlarsimaffeqanngitsullu ornittagaat atisanik oqortunik piumagaangata ikiortapavut. Amerlasuunik suliaqarlutalu ikiuisarpugut. Inoqammik ikiuineq namminermi akissarsiaavoq,” Taama oqarpoq Nuummi Røde Korsimi siulittaasup tullersortaa aammalu pisiniarfimmi nammineq kajumissuseq atorlugu sulisartoq Ane Marie Lauritsen.