Birte Nielsen Nuummi innuttaasut initaarnissamut sivisuumik utaqqinermik misigisaqarsimasut ilagaat. Ukiuni qulini arriitsunnguamik utaqqisut allattorsimaffimmi siuariartorsimavoq, neriupporlu qanittumi initaarsinnaassalluni.
Nuummi initaarnissamut utaqqisut allattorsimaffianni utaqqisorpassuit nutaarsiassaanngillat. Naak inissianik attartortitsisalernikkut utaqqineq Iseritimit ukiunik sisamanik sivikillineqaraluartoq, suli attartornissaminnut neriulluartut naammagittartariaqarput. Tassa naammagittarluinnartariaqarput.
Maannakkut inimik attartornissamut ukiut aqqanillit utaqqisoqarnissaa naatsorsuutigineqartariaqarpoq, ukiullu qulit qaangiutereermata Birte Nielsen isumalluarsinnaalerpoq. Inuilli tamarmik taamatut inissisimanngillat.
”Isumaqarpunga inuit sivisuallaamik utaqqisartut. Inuusuttut ilaat allatsikkaangamik ukiut aqqanillit qaangiunnerani inissisimanerat allarujussuusinnaasarpoq”, Birte oqarpoq.
Inissianik amerlanernik sanaartortoqarli
Maanna Birte sisamanik initalimmik ineqarpoq, tamannalu angivallaarujussuarpoq. Mikininnguamik initaarusukkaluarpoq, taamaaliorsinnaagunilu maanna inigisaa ilaqutariinnit amerlasuunit inigineqarsinnaassaaq.
”Soraarneruvunga politikikkullu akulerunnissara kissaatiginngilara. Utaqqisut allattorsimaffianniittut ikilinissaat pillugu Nuummi inissiat amerlanerusut sanaartorneqarnissaat kissaatigiinnarpara” Birte oqarpoq, tamatuma saniatigut inissianik pissarsiniarluni Kommuneqarfik Sermersuup periusaanut tunngatillugu isummerusunngilaq.
”Ilaatigut innuttaasut pillugit ilungersortoqarsinnaavoq, kommunilu taamaaliorsimavoq. Neriuppunga qanittumi initaassallunga” oqarpoq.