Services

Kommunalbestyrelsip isumaqatigiilluni meeqqanut ilaqutariinnullu inuuniarnermikkut ajornartorsiuteqartunut politikki nutaaq akuersissutigivaa

Kommunalbestyrelsimi meeqqanut ilaqutariinnullu inuuniarnermikkut ajornartorsiuteqartunut politikki 2020-2024 siammasissumik tapersersorneqarpoq. Ukiuni aggersuni susassaqarfiit pingasut immikkut aallunniarneqassapput.

Kommuneqarfik Sermersuumi marlunngormat kommunalbestyrelse ataatsimiikkami kommune ukiuni tulliuttuni sisamani sunik suliniuteqarluni ingerlassasoq isumaqatigiittoqarpoq. Tassani suliniuterpassuit imartuut pineqarput, tamakkerlugillu atuarsinnaavatit uani linkimi (link)

Ukiuni sisamani tulliuttuni pingaarnersiukkat pingaarnerit tassaapput:

  • Meeqqat pillugit suliat amerlassutsimikkut ikinnerulersinneqassasut – matumani ulloq unnuarlu angerlarsimaffinni sivisunerusumik inissiisarnerit ilanngullugit
  • Meeqqat inuusuttullu siusissukkut suliniutit aqqutigalugit suliniuteqarfigineqartarnerisa pitsaanerulersinneqarnissaa
  • Meeqqat ilaqutariillu inuuniarnermikkut ajornartorsiuteqartut pitsaasunik neqerooruteqarfigineqarnissaat

”Inissiisarnerit amerlassusiisa qaffakkaluttuinnarnera unitsissinnaagatsigu assut nuannaarutigivara, tamannali naammanngilaq. Massakkut amerlassusiisa ikilisinnissaat sulissutigilissavarput. Ilaqutariit tamaasa ikiorniarpavut, meeraq qitiutillugu  taamaattumillu partiit qalipaataat apeqqutaatinnagu qanoq suleriuseqarnissatta isumaqatigiissutiginissaa pingaaruteqartuuvoq.” borgmesteri Charlotte Ludvigsen oqarpoq.

Susassaqarfiit sallinngortinneqartut pingasut saniatigut, pissutaasut allat aqqanillit suussusersivagut, meeqqanik sumiginnaanermut pissutaasinnaasut, tamannalu pinngitsoortinniartariaqarparput. Inissaaleqineq pissutaasunut ilaavoq, susassaqarfillu tamanna kommunimit ukiuni kingullerni siuariarfiusimasutut isigineqarpoq, taassani pitsaasunik aalajangersimasunik iliuuseqartoqaannarnissaa periarfissaqarluarpoq.