Inunnut innarluutilinnut aamma tarnimikkut nappaatilinnut Immikkoortortami, Tilioq-mi aamma NIIK-mi (Nunatsinni Inuit Innarluutillit Kattuffiat) ersinngitsumik innarluuteqarneq sapaatip akunnerani 41-mi qitiutillugu sammineqarpoq.
Sisamanngornermi oktobarip 8-ni kikkut tamarmik Katuamut aqqusaarnissaminnut periarfissaqarput, tassani ersinngitsumik innarluuteqarneq pillugu aaqqissuussisoqartussaavoq.
Katuami aaqqissuussinermi filmit naatsut 7-it takutinneqassapput. Filmini naatsuni ersinngitsumik innarluuteqarneq qanoq misiginartarnersoq oqaluttuarineqarpoq. Ilaatigut autisme, tusillanneq, skizofreni aamma isikkut innarluuteqarneq annerusumi paasisaqarfigineqarsinnaapput.
-Ersinngitsumik innarluuteqarnerup siumut isummerfigineqareertarnera nungusaaqataaffigerusupparput. Inuit ersinngitsumik innarluutillit assersuutigalugu inunnut assakaasulimmik issiavilittulli aamma pisiniarfinni ilisivinni qullerni inorsartarnerat pillugu ikiorneqarnissaminnik pisariaqartitsisarnerat inunnut paasiuminaassinnaasarpoq. Ersinngitsumik innarluuteqarnerup paasineqarnerulernissaa annertunerusumik sammissavarput, inuit innarluutillit illersuisuat Christina Johnsen oqarpoq.
Aaqqissuussinermi innarluutillit peqatigiiffii assigiinngitsut naapinneqarsinnaapput. Siunnersorneqarnissamik ilitsersorneqarnissamillu pisinnaavutit, nammineq ersinngitsumik innarluuteqarsimaguit imaluunniit ersinngitsumik innarluuteqarneq annertunerusumik paasisaqarfigerusukkukku.
Suleqatigiinneq nuannarineqartoq
Kommuneqarfik Sermersuup ataatsimoorussilluni Kalaallit Nunaanni Inunnut Innarluutilinnut suliniaqatigiiffiit aamma Tilioq suleqatigalugit aaqqissuussineq nuannaarutigivaa, tassani Ersinngitsumik Innarluuteqarneq immikkut sammineqarmat.
Inunnut innarluutilinnut aamma tarnimikkut nappaatilinnut Immikkoortortami Fagchefi, Susanne Kerulff Ettrup, oqarpoq ersinngitsumik innarluuteqarnerup immikkut sammineqarnissaa qanoq pingaaruteqartigisoq:
– Ersinngitsumik innarluuteqarneq, ukioq manna Sapaatip akunnerani 41 qulequtarineqartoq, nappaatinut inunnit allanit takuneqarsinnaanngitsunut tunngassuteqarpoq. Innarluutaasinnaavoq assigiinngitsutigut aporfissaqartitsisoq, innuttaasup tamakkiisumik iluaqutaasumillu inuit allat assigalugit inuiaqatigiinni inuunermut peqataasinnaaneranik killiliisoq. Tassami Innarluutillit peqatigiiffiisa aamma suliniaqatigiiffiit pitsaasumik qanimullu suleqatiginissai Kommuneqarfik Sermersuumut pingaaruteqartuuvoq, matumani aamma Tiliup suleqatigilluarnissaa ilaavoq, taannami aqqutigalugu ataatsimut isiginnittumik innuttaasut innarluuteqartut suliniuteqarfigineqarnissaat qulakkeerneqartussaammat.