Innuttaasunut

Pinngortitamiinnerulerit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Illuaqqat oqqiffissat qulisat marluk Qinngutsinni sananeqaqqammerput.

Illuaqqat oqqiffissat qulisat iluaqutaalluavissapput kommunimmi kissaatigimmagu kommune nunarsuarmi timimik atuiffiunerpaassasoq, innuttaasullu illoqarfimmut qanittumi najugallit qaqqaliartarnissaannut periarfissaqalissallutik silami susassaqarniassammata, naak angallammik aallarnissaminnut periarfissaqanngikkaluarlutik imaluunniit ungasissumut pisunnissaminnik pisinnaarpiarunnaaraluarlutik.

Oqqiffiit Nuummi Najukkami Ataatsimiititaliap 2019-imi Qinngutsinnut tunngatillugu suliniutaannut ilaapput, misiligutillu ilaanniillutik. Oqqiffiit Nuummi innuttaasunit atorluarneqariarpata, illoqarfiup iluani avataanilu amerlanerusunik pilersitsisoqassaaq.

Oqqiffiit marluk Qinngutsinni pilersinneqartut imminnut qanikannersumi pilersinneqarput, asiartarfittut atorneqarsinnaanissaanik kissaateqartoqarnera aallaavigalugu. Oqqiffiit angissusiat eqqarsaatigalugu assersuutigalugu atuartut klasse ataaseq taqussaminnik neriartorfigisinnaavaat. Aammami imminnut attuumassuteqanngikkaluartunit atorneqarsinnaapput, soorlu aappariinnit inunnillu ikittunnguanit.

Aamma kingusinnerusukkut Qinngutsinni umiatsialiviup eqqaani pilersitsisoqarumaarpoq.

Oqqiffiit Nuummut tamarmik atorsinnaavaat, taamaattumillu taakkunani inissanik atuinermi malittarisassaliortoqarpoq:

  • Nunaminertami tamaani eqqaamiut allallu takkuttut eqqarsaatigikkit
  • Oqqiffik nammineq atorusutattut torersumik qimaguk
  • Oqqiffeqarfik qimalerukku igitassatit nassakkit
  • Qimmeq pitussimatiguk
  • Oqqiffeqarfinni tamani kingusinnerpaamik nal. 22.00 nipiliortoqaqqusaanngilaq
  • Oqqiffiit paarisigit oqqiffeqarfik ilanngullugu, atuisussat tullinnguuttut taamaalillutik nuannaarutiginiassammassuk.

”Nuannaarutigisorujussuuarput marluk atorneqarnissaminnut piareermata, neriuppugullu, Nuummi innuttaasut tamarmik taakkua piffissami aggersumi nuannaarutigiumaaraat, Nuummi Najukkami Ataatsimiititaliami siulittaasoq Poul Pedersen oqarpoq.