Innuttaasunut

Kommuneqarfik Sermersooq kulturimut tapersersuisuuvoq – aningaasanik tapiissutinik pisinnaavutit [1]

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Tapiissuteqartarfik Sermeq kommunimi kulturimut tunngasunut suliniutinut aammaarluni aningaasanik tapiissuteqassaaq. Kulturimut tunngassutilinnik suliaqartartut, peqatigiiffiit inuillu eqimattat ataasiakkaallu 1. oktobari tikillugu tapiissutinik qinnuteqarsinnaapput  – qanoq iliornissat pillugu paasissutissat sukumiinerusut atuarsinnaavatit.

 

Sapinngisamik kulturikkut pisuussutit siuarsarnissaat Kommuneqarfik Sermersuup kissaatigaa, tamannalu pillugu Tapiissuteqartarfik Sermeq pilersinneqarpoq. Tapiissuteqartarfimmit suliniutit assigiinngitsut piviusunngortinnissaanut tapiissuteqartoqartarpoq, tapiiffigineqarnissamillu kissaateqaruit/ssi qinnuteqaatersi kingusinnerpaamik 1. oktobari nassiutereersimassavarsi, tassa suliniut ukioq manna qinnuteqartunut akuunissaa kissatigineqarpat.

”Kommunitsinni suliniutit kulturimut tunngassutillit piviusunngortinneqartussat suussanersut takunissai qilanaaraarput. COVID-19 peqqutigalugu katersuussinnaanermut killilersuinerit qinnuteqartussat eqqumaffigissagaat erseqqissaatigissavarput. Tamassuma saniatigut qinnuteqartut suliniutaat eqqarsaatigalugit kulturimut tunngassutillit suliniutit innuttaasunut ulluinnarni eqqumiitsulianik kulturimullu tunngassutilinnik takoriaannaasaannik aqqutissiuisut ilaatigut pingaartinneqassapput. Kommuneqarfik Sermersuumi sumiiffinni tamanit qinnuteqaatit tiguneqarsinnaapput, taakkulu Kulturitta siuarsarneqarnissaa pillugu Siunnersuisoqatigiinnut saqqummiunneqassapput”, Immikkoortortaqarfimmi aqutsisoq Jula Maegaard-Hoffmann taama oqarpoq.

Apeqqutissaqaruit mailikkut saaffiginninnissanut tikilluaqqusaangaarputit: kultur@sermersooq.gl. Qinnuteqaatit tigunissaa qilanaaraarput!

FAKTABOKS Tapiissuteqartarfik Sermeq pillugu

Kultureqarnermut immikkoortitat kulturikkut suliaqarnermi nutaanik misileraaffiusunik pilersitsinissamut kulturimillu suliaqartut assigiinngitsut, namminersorlutik inuussutissarsiortut kommunimilu innuttaasut akornanni suleqatigiinnermik siuarsaanermut atorneqassapput.

Aningaasaateqarfik Sermeq ukiumut marlunnik killeqartitsivoq: marsip aallaqqaataani aammalu oktobarip aallaqqaataani.

Tapiissuteqartarfik Sermeq pillugu paasisaqarnerorusukkuit nittartagaq una takuuk: https://sermersooq.gl/kl/innuttaasunut/eqqumiitsuliorneq-kulturi/sermeq-puljen