Ippassaq Kommuneqarfik Sermersuumi atuarfinni assingiinngittuni inuusuttut kommunalbestyrelsiannut qinersisitsisoqarpoq. Atuarfiit arfineq-marluk aatsaat sapaatip akunnera 38-mi qinersisussaapput.
Atuartut 7, 8 aamma 9. klassimeersut Inuusuttut kommunalbestyrelsianut, ulluinnarni INUUSUKOMBEST-imik taaneqartartunut, ilaasortassatut piukkussaminnik qinersipput.
Meeqqat inuusuttullu innuttaaqataasutut piginnaatitaaffeqarnerat aammalu Kommuneqarfik Sermersuumi innuttaasunik akuutitsinissaq tunuliaqutaralugit, ingammillu meeqqat qitiutillugit kommunalbestyrelsip INUUSUKOMBEST atuutilersinneqarnissaa juuni 2017-imi akuersissutigaa. INUUSUKOMBEST-imut ukioq allortarlugu qinersisoqartarpoq.
“Meeqqavut inuusuttavullu inuiaqatigiinni nukittuumik attaveqarfeqarsinnaanermik attaveqarnermillu pilersitsisinnaanermik ilisimaaralutik peroriartussapput, nalussanngilaallu qinersinerminni tusaaneqartarnissaq. Tusaaneqarnissaq, takorluugaqarnissaq najukkamilu piumasaqarsinnaaneq isumalerujussuupput. Annertuunik annikitsunillu pilersitsissagaanni ataatsimoorluni iliuuseqarsinnaaneq aamma piviusunngortinneqarsinnaavoq”, Borgmester Charlotte Ludvigsen oqarpoq.