Services

Asfaltiliorfittaaq iluaqutigineqaqattaartoq

Nuummi mittarfiliorneq naammassippat Kommuneqarfik Sermersuup asfaltiliorfik nutaaliaalluinnartoq tigussavaa, taanna siuliminit pisoqalisumit sukkanerujussuullunilu avatangiisinut mingutsitsinnginnerujussuuvoq. Taanna arlalinnit iluaqutigineqassaaq.

Nutaamik asfaltiliorfittaarneq arlalinnut iluaqutaavoq, pingaarnerusumilli avatangiisinut innuttaasunullu.

Assersuutigalugu Nuummi biilertaruit maluginiarsimassavat piffissami kingullermi sumiiffinni arlalinni biilerfigiuminarnerulersimasoq. Tassani patsisaavoq, asfaltiliorfittaap atulernikuunera asfaltiliarineqartorlu asfaltiliorfitoqqamut sanilliullugu annertunerujussuanngornikuunera. Taamaalillunilu siornatigumut sanilliullugu pilertornerujussuarmik asfaltiliortoqarsinnaalerluni.

Asfaltiliorfitoqaq tamakkiisillugu nalunaaquttap akunneranut 30-40 tonsi asfaltiliarisinnaagaa asfaltiliorfittaaq piffissami taamaaqataani 150 tonsi asfaltiliarisinnaavaa allaallu avatangiisinut mingutsitsinnginnerujussuulluni. Asfaltiliorfittaaq avatangiisinut tunngasumik akuersissuteqarpoq, Danmarkimilu nutaamik asfaltiliortoqarnissaanut atatillugu avatangiisinut tunngasunik piumasaqaatinik tamanik eqqortitsilluni.

Ujaqqat pujoralaat asfaltiliornermi katersorlugit atoqqinneqarsinnaasarput soorlu aamma asfaltitoqaq piiarneqartoq asfaltiliornermi maannakkut atoqqinneqarsinnaalersoq. Avatangiisinut mingutsitsinnginnerunera atortussanik atuinissamut sipaaruteqartitsissaaq.

Amerlasuunut iluaqutaasoq

Asfaltiliorfittaaq Nuummi inissisimagaluartoq allani illoqarfiup avataani iluaqutigineqarsinnaassaaq. Asfaltili ullut marluk tikillugit assartorneqarsinnaanera pillugu asfaltiliorfik assersuutigalugu Paamiunukaatassamik asfaltiliorsinnaalissaaq. Taamaalilluni ingerlatsivimmit pilersaarutigineqalerpoq, aappaagu asfalti umiarsuakkut assartorneratigut Paamiuni aqquserngit asfaltilersorneqarnissaat immaqalu aamma nunaqarfiit arlallit.

Rekordileeqqinneq

Asfaltiliorfik nutaarluinnaq sukkasuumik asfaltiliorsinnaavoq. Asfaltiliorfitoqqap asfaltiliarisinnaasaa sapaatip akunnerani kingullermi aappassaanik qaangerujussuarneqarpoq, ullormi ataatsimi asfaltiliornermi siornatigut rekordiusimasoq 345 tonsinik annertussuseqarpoq, taannalu 360 aamma 380 tonsinik qaangerneqarpoq.

Kisitsisit taakku ulluinnarni tamakkuninnga suliaqartanngikkaanni takorlooruminaassinnaapput. Rekordiliineq kingulleq 380 tonsiuvoq, taannalu aqquserngup silissusaa naallugu 1.200 meterinik takissusilimmut siaarneqarpoq.