Qeqertarsuatsiaat ullumikkut aamma siunissami pillugu Borgmesteri Charlotte Ludvigsen Qeqertarsuatsiaani innuttaasunik ataatsimiititsivoq. Tikeraarnermittaaq nunaqarfimmi aqutsisut ataatsimeeqatigineqarput
Aavariartorpassuaqaraluartoq innuttaasunik ataatsimiititsinermi illu ulikkaarlugu takkupput. Innuttaasut borgmesterimit tikilluaqquneqarput kingornalu Sanarfinermut Avatangiisinullu Ingerlatsivimmi atorfilittaq saqqummiitinneqarpoq. Saqqummiinermini nunaqarfimmi sanaartornermut ingerlatsinermullu pilersaarutit nassuiaatigineqarput. Nunaqarfimmi eqqagassat innuttaasunit annertuumik iliuuseqarfigineqarsimaneri pillugit atorfilittaq qujassuteqarpoq.
Sanarfinermut Avatangiisinullu Ingerlatsivimmit saqqummiussisoqareernerata kingorna innuttaasut suleqatigiiaallutik Qeqertarsuatsiaat siunissami qanoq isikkoqassanersoq pillugu oqallitsinneqarput. Uummaarilluinnartumik oqallittoqarpoq oqallinnerallu minutsinik tallimanik sivitsorneqarluni. Tamatuma kingorna oqallisigineqartut borgmesterimut saqqummiunneqarput. Cafémik ammaanissaq meeqqanullu fritidshjemmi eqqartorneqarput. Tulukkat teriannissallu nunaqarfimmi ajornartorsiutaasartut arlalinnit taakkartorneqarportaaq, ilaatigut eqqaavissiortaramik eqqakkallu sumi tamaaniilertarlutik. Inuusuttut nunaqarfimminut uterusuttut, inissaaleqisut aamma oqaatigineqarpoq.
Siunnersuutitut saqqummiunneqartut tamarmik allattorneqarput apeqqutillu borgmesterimit akissuteqarfigineqarnissaannut piffissaqarfigineqarlutik.
Nunaqarfimmi aqutsisunik ataatsimeeqateqarneq.
Nunaqarfimmi aqutsisuniittut tassaasut aqutsisuni siulittaasoq Ingvar Motzfeldt, Gertrud Henriksen aamma Anda Nathanielsen nunaqarfimmi pitsanngorsaataasinnaasunik siunnersuutiminnik saqqummiipput. Nunaqarfimmi sanaartugassanik pilersaarusiat, inissiallu matumani eqqartorneqarput,
Nunaqarfimmi aqutsisunik ataatsimeeqateqareernerup kingorna Charlotte Ludvigsenip utoqqaat illuat Utoqqallak pulaarpaa, tassanilu aqutsisumit, Bente Johnsenimit tikilluaqquneqarpoq. Qalaqqaanik boller’qarlunilu kaffillertoqarpoq, borgmesterillu ineqartut issiaqatigalugit oqaloqatigivai. Aqutsisoq Bente Johnsen oqarpoq, ineqartut borgmesterimik naapitsinissartik qilanaarisimagaat, aamma tikeraarneqarluni assut nuannertoq.
Aamma atuarfimmi meeqqerivimmilu alakkaanissaq piffissaqarfigineqarpoq. Taakkunani unamminartut eqqartorneqarput, aamma ulluinnarni qanoq ingerlanersut ilanngullugit.