Services

Nukissalissuaq Kulturimik Nittarsaassisunngorpoq

Arfininngorneq unnukkut aggustip ulluisa 22-anni Kulturikkut Nittarsaassisuuneq Nunatta Isiginnaartitsiviani aaqqissuussinikkut allamut tunniunneqarpoq. Borgmesterip Charlotte Ludvigsenip nalunaarutigaa nittarsaassisussanngortoq tassaasoq 35-nik ukiulik isiginnaartitsisartoq eqqumiitsuliortorlu, Ujarneq Fleicher.

Toqqaanissaq sioqqullugu Niviaq Korneliussenip videokkut ilassinnissutaa takutinneqarpoq taannalu Ujarneq Fleischerip nittarsaassisunngorneranik pilluaqqusivoq.

Aamma Borgmesteri Charlotte Ludvigsen oqalugiarpoq ilaatigullu ima oqarluni;

“Suliarisartakkanni assigiinngitsorpassuarnik periuseqarsinnaaneq takutereerpat, soorlu naatsunik isiginnaagassialiortarnermit inuusat atorlugit uummateqarfigalugu isiginnaartitsinermut. Taamatut kulturimik sammisaqartunut tapersersuinissamut Aningaasaateqarfik Sermeq pilersinneqarnikuuvoq – kulturilerinermi nutaanik misileraasarneq pilersissallugu”.

2020-mi Kulturikkut Nittarsaassisussamik toqqaanermi isumaqatigiissutigineqartumik toqqaasoqarpoq.

Ujarneq Fleischer filminiit, isiginnaagassianit naatsunit aamma isiginnaartitsisarnermit ilisarisimaneqarpoq. Kingullertigut Covid-19 pillugu meeqqanut inuusuttunullu paasititsiniaalluni isiginnaagassialioqataavoq.

Aaqqissuussinermi Kusernerit nipilersorlutik tusarnaartitsipput aamma isiginnaartitsisartoqatai Kimmernaq Kjeldsen Ane Marie Ottosenilu oqalugiarlutik. Toqqaasoqareermat Ujarneq Fleischerip eqqumiitsulianik saqqummersitani Nunatta Isiginnaartitsiviani ammaanersiorpai.