Services

KS aamma Tele: Tunumi internetti sukkanerulertussanngorpoq

Borgmesteri Charlotte Ludvigsen qanittukkunni suliffeqarfimmut Tele-Post-imut pulaarpoq. Tassani naapippaa Tele-Postimi pisortaaneq Kristian Reinert Davidsen.

Ataatsimiinnermi Tele-Post-imi pisortaanerup Kristian Reinart Davidsenip suliffeqarfimmut periusissiap ukioq manna atorunnaartussap killiffia saqqummiuppaa, 2021-mullu suliffeqarfimmut periusissiamut atatillugu atuisut suut naatsorsuutigisinnaaneraat sunalu pingaarnerutinneqarnersoq pillugu nassuiaavoq. Kommunip suliffeqarfiullu akornanni suleqatigiinneq tamanit iluarisimaarneqartoq oqaatigineqarpoq, illuatungeriillu siunissami suliniutit amerlanerit suleqatigiissutigisinnaasaat isumalluarfigaat.

Ullumikkut Tunumi satellit pillugu suliniut, sumiiffimmi attaveqaatinik pitsanngorsaataasussaq, suleqatigiissutigineqarpoq.

COVID-19-ip kinguneri suliffeqarfimmi pulaarnermi oqaluuserisassat aamma ilagivaat.

Tele-Post aamma Kommuneqarfik Sermersooq 2020-mi januaarip qaammataani ataatsimut naleqarluartumik suliniuteqarnissaq pillugu suleqatigiinnissamik isumaqatigiissusiorput, tamatumani meeqqat inuusuttullu digitalimik inuunerminni atuinerat pingaarnerutillugu piujuartitsinissaq toqqammavigineqarpoq. Suleqatigiinnermi meeqqat atuarfianni misiliutigalugu suliniut ”Coding Classes” ilaatinneqarpoq.