Services

Kommunimi eqqiluisaarnissamut suliniummut atatillugu aqutsisooqatigiit

Kommuneqarfik Sermersooq patajaatsumik suliniuteqarnissaq qulakkeerniarlugu kommunimut sulisunut tamanut atuuttumik eqqiluisaarnissamut periusissiaq atuutilersinneqarpoq. Tamatuma saniatigut kommunimi ingerlatsivinnut assigiinngitsunut tapersersuillutik ikiuisussanik assigiinngitsut akornanni aqutsisooqatigiinnik pilersitsisoqarpoq.

Kommuneqarfik Sermersooq eqqiluisaarnissamut periusissiamik atuutsitsilerpoq sulisut eqqiluisaarnissamut tunngasunik suliaqarnerulernissaat qulakkeerniarlugu, sulisullu tamarmik qulakkeerinninnissamut peqataaniassammata.

Kommunimi immikkoortorpassuarnik assigiinngitsunik suliaqartarmat immikkoortortaqarfinni ulluunerini neqeroorutini, atuarfinni, angerlarsimaffimmi ikiorteqarfimmi allaffissornermilu eqqiluisaarnerunissamut immikkut ittumik ilitsersuusiornissaq pisariaqarsimavoq. Tamatuma saniatigut eqqiluisaarnissamut ilitsersuutinik pitsaasunik meeqqerivinnut atuarfinnullu tamanut plakatiliortoqarpoq, taamaaliornikkut meeqqat inuusuttullu tamarmik pisarialinnik ilisimasaqalerniassammata.

Pitsaasumik eqqiluisaarluni ileqqoqarnikkut peqqinneq pitsaasumillu inuuneqarneq eqqumaffigineqarnerulissaaq. Tamanna iluatsissappat, peqqissaartumik eqqiluisaarneq Kommuneqarfik Sermersuumi sulisunit innuttaasunillu tamanit malinneqassaaq. Matumani pitsaasumik eqqiluisaarluni avatangiiseqarnissap eqqumaffiginissaa anguniagaavoq, piffissallu ingerlanerani suliniut innuttaasunut saatinneqassaaq, taamaalillunilu inuiaqatigiinnut iluaqutaalissalluni.

“Piffissaq ungasinnerusoq eqqarsaatigalugu massuma napparsimanerit ikilinerannik pitsaanerusumillu eqqiluisaarluni avatangiiseqalerneq kingunerisinnaavaa, saniatigullu inuiaqatigiit aningaasaqarniarnerat pitsannguuteqarfiginissaanut periarfissaassalluni, Kommuneqarfik Sermersuumi Gerth Jakobsen naggasiivoq.”