Services

Kalaaliaraq assiliamik kusanartumik tunisippoq

Kommuneqarfik Sermersuumi borgmesteriusimasoq Asii Chemnitz Narup sisamanngornermi aggustip ulluisa 27-anni assiliamik tunisisuuvoq, assiliaq tunissutigineqartoq qanga ullumikkullu inuunerup ataqatigiinnerannik takutitsivoq.

Asii Chemnitz Narup borgmesteriusimanermini innuttaasunit tapersersorluarneqartarsimanini qujassuteqarfiginiarlugu Kalaaliaraq, aasaq manna juulip ulluisa 21-anni inuiattut ullorsiornitsinni ammaqqissimasoq, assiliamik tunissuteqarfigaa.

”Ukiarli aalajangernikuuvunga borgmesteriunerma nalaani innuttaasut tapersersuisarsimanerannut qujassuteqarniarlunga, tamannalu tunissummik tunisinermik takussuserniarpara.” Asii Chemnitz Narup ilaatigut taama oqarpoq, nangillunilu; ”Isummasi uannut apuutissallugit tunuarsimaartarsimanngilasi nersualaarinnittarnerit, qujaniartarnerit, siunnersuuteqartarnerit minnerunngitsumillu isornartorsiuisarnerit, isummallu taakuupput Kommuneqarfik Sermersuumi innuttaasut tamarmik sullilluarnissaannut nukissanik tunisisartut.” Asii najuuttunut oqalugiarnermini oqarpoq.

Tunissut kusanartoq

Asii innuttaasunut qujassuteqarluni tunissuteqarniarluni aalajangerami kommuuni suleqatigalugu aalajangersimapput tunissut Kalaaliaqqami nivinngarneqarnissaa.
”Assiliaq kusanangaartoq, Angu Motzfeldtimit assilineqarsimasoq, Kalaaliaqqap saqqaani nivinganissaa tulluarluinnarpoq. Assiliammi qanga ullumikkullu inuunerup ataqatigiinnerannik ersersitsivoq.” Asii oqarpoq.

Uleersisoqarnera Asii, bormesteri, kommunalbestyrelsemi ilaasortat ilaat, Najukkumi Ataatsimiititaliami siulittaasoq kiisalu Kalaaliaqqami Ataatsimiititaliamiit peqataaffigineqarpoq.

”Asii, qujanaq”

Ullumikkut Kommuneqarfik Sermersuumi borgmesteriusoq Charlotte Ludvigsen najuuttuni ilaavoq. Borgmesteri aaqqissuussinermi aamma oqalugiarpoq.

”Uanga aamma innuttaasut sinnerlugit Asii kommunerput sullilluarsimammagu qujarusuppunga. Illit (Asii) kommunitta ineriartorneranut sunniuteqarluarsimavutit. Nalunngilarput Asii siuttuullaqqissuusoq, takutitsillaqqissuusarlunilu siunnerfinnik, qimoqataasarsimaqaagullu” Borgmesteri Charlotte Ludvigsen ilaatigut oqalugiaammini taama oqarpoq.

Oqalugiartoqareermat qilaatersortoqarlunilu tusarnaartitsisoqarpoq. Qilaatersortartoq Leif Immanuelsen qilaatersoreermat Asiip uia Juaaka Lyberth guitarilisarluni nipilersukkamik tusarnaartitsivoq. Juaaka Lyberthilu appisimaareermat innuttaasut ilaat, arnaq utoqqasaaq najuuttut tamarmik atorsinnaasaannik erinarsuummik kissaateqarpoq, ”Ukiap Seqerna Pukkilisoq” taamaasilluni najuuttuniit erinarsorneqarluni.
Inuit 150-it missaaniittut aaqqissuussami najuupput.