Innuttaasunut

Ilinniarnerit isumaginninnermut tunngasut sipaarfigineqarnerisa ilungersuussiumatuunut killiliipput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Annikitsumik ikililerineq meeqqat ikiortariallit, taakkuninngalu ikiuerusuttut, annertuumik sunniuteqarfigisinnaavai. ”Siunissaq takusinnaanngilara” Tasiilami sulisut pingaarutillit ilaat, ilinniaqqinnissaminik unitsitsiinnartariaqartoq, oqarpoq.

Isumaginninnerup iluani ilinniarnernut aningaasaliissutaasartut ilaat ukioq manna aningaasanut inatsisissamut ilaatinneqanngillat. Tassaapput siunnersortimut ikiortitut ilinniarneq, siunnersuinermi diplomitut ilinniarneq, aammalu isumaginninnermut siunnersortit ilinniaqqittarnerat tamarmik ukiut ingerlanerini taamaatinneqarput.

Sulisumut Mette Nukomut tamanna inuiaqatigiinni ikiortariaqartunik ikiuerusussuseqarnera ilinniaqqinnissaanut naapertuukkunnaarpoq.

”Isumaginninnerup iluani ilinniaqqinnissannut piumassuseqarluarpunga, innuttaasunillu ikiortarialinnik sullissinissannut sakkussannik pissarserusullunga, periarfissarli tamanna atuukkunnaarpoq, siunissaq takusinnaanngilara. Allamik suliffissarsiortariaqarpunga,” Mette Nuko Tasiilameersoq oqarpoq.

”Ukiuni arlalinni sullissisunik amigaateqartarpugut, sulilu ilinniarsimasunik sulisoqalertuugutta uatsinnut pitsaanerpaajussagaluarpoq. Uanga ilinniarusukkaluarpunga”, ilassusiivoq.

Annikitsumik sipaaruteqarneq – annertuunik sunniuteqarpoq

Namminersorlutik Oqartussanut tamakkiisumik sipaarutissat annikitsuupput, taamatulli sipaarniarnissaq kommuninut akisoorujussuanngorsinnaavoq. Tassami ilinniartitaanerit atorunnaarsinnerisa kingunerisaannik isumaginninnerup iluani suliffittaarniartarnerit ajornakusoornerulersinnaapput, naggataatigullu innuttaasunik ikiortarialinnit pitsaanngitsumik sullissinernik kinguneqarsinnaallutik.

Isumaginninnerup iluani ilinniartitaanerit ilanngarneqarnerisa kommunimi sullissinermut sunniuteqarnerlussinnaanerni, Isumaginninnermut pisortap Martha Lund Olsenip uppernarsarpaa.

”Sullissinitsinni isumaginnittunut ikiortit pingaaruteqartorujussuupput. Illoqarfinni mikinerusuni isumaginninnermut siunnersortinik amigaateqarfiusuni, suliat meeqqanut tunngasut suliariuminaallissapput. Taamaammat Namminersorlutik Oqartussat ilinniartitaanernik taakkuninnga unitsitsinerat uanga ernummatigisorujussuuara”, Martha Lund Olsen oqarpoq.

Ungasinnerusoq eqqarsaatigalugu Martha Lund Olsenip aarlerinartoqartippaa, ilinniartitaanerup atorunnaarsinneqarneratigut isumaginninnerup tungaatigut sulisussarsiortarnerit suli ajornakusoornerulernissaat. Tassami siunnersuisartunut ikiortitut sulineq suliassaqarfimmi ingerlariaqqiffissatut aallartissutaasarpoq.

”Isumaginninnermut siunnersortitut sulisuvut amerlanerit najugaq qimannagu ilinniarnerminnik ingerlatsisarput, tassanilu ilinnialerumagaanni, siunnersortimut ikiortaareertariaqarpoq. Taamaammat najugaq qimannagu isumaginninnermut siunnersortitut ilinniarneq aamma atorunnaarsinneqarnikuuvoq, tamatumalu kingunerisaanik ukiut arlaqanngitsut qaangiuppata sulisunik ilinniarsimasunik pissarsiniartarnerput suli ajornarnerulissaaq”, Martha Lund Olsen oqarpoq. Isumaginninnermut siunnersortit ilinniaqqiffissaat ilanngarteriffigineqarnerisigut, meeqqanik ikiortariaqarnerpaanik sullississineq aamma ajorseriartussaavoq.   

Kommunit meeqqanik sullissinerat amerlasuutigut Namminersorlutik Oqartussanit isornartorsiorneqartarpoq, tamannarpiarlu pissutigalugu Kommuneqarfik Sermersuumit Namminersorlutik Oqartussat tamassuminnga tapersersuiumannginnerat paasiuminaatsinneqarpoq. Suliassani meeqqanut tunngasuni ilinniarsimasunik sulisussarsiortarneq unammillernarnerpaavoq, suliassarlu tamanna kommunip kisimiilluni kivissinnaanngilaa. Namminersorlutik Oqartussat ilinniarnermut tunngasut tigummivaat, sullissinerlu iluatsissappat tamanna kivinneqartariaqarpoq.