Immaqa siunissami illoqarfimmi illorsuit ilaanni eqqumiitsulianik takusaqartalissaatit. Maani eqqumiitsuliortut graffitikultur-MasterClass illorsuit igaanni eqqumiitsuliorneq ingerlatarisimavaat, arlalinnillu suliaqarsimallutik. Suliat tamakkua ilaatigut Sacha Malinský-mit – Cheeky-tut ilisimaneqarnerusumit suliarineqarsimapput. Kalaallit Nunaanni Nunani Avannarlerni Siunnersuisoqatigiit Nuummilu Najukkami Ataatsimiititaliaq aningaasaliisoralugit eqqumiitsuliat Nuummi illorsuit iigaanni ataavartussatut saqqumilersussaassapput
Maani eqqumiitsuliortut tallimat apriilimi graffitikulturi pillugit ilinniartinneqarlutik aallartipput, ilaatigut tassaallutik Malik Chemnitz, Maria Kreutzmann aamma Nivi Lynge. Maannakkut eqqumiitsuliortut seqqitsaalluni suleriaatsinik ilikkarnerulersimapput, suliaminnillu saqqummersitsinissaminnut piariilerlutik. Suliniummut tassunga aningaasalersuisuupput Nuummi Najukkami Ataatsimiititaliaq, Nunat Avannarliit Siunnersuisoqatigiiffiat aammalu Kommuneqarfik Sermersooq. Nukissiorfiit illuutaanni iikkat qalipanneqarsinnaalerput.
Inuit ilaannut street art aamma graffiti atorlugu eqqumiitsuliorneq kusanaatsutut illoqarfiullu isikkuanut akornusersuutaasutut isigineqartarput, kisianni graffiti imartunerusumik paasineqarsinnaavoq. Sacha Malinský ima oqaluttuarpoq:
– Eqqumiitsuliornissamut tunngasumik suliaq aallartinngikkallarmat, ikittuinnaat Nuummi kusanartuliorlutik aallartereernikuupput. Suliniummi uanga siunertaraara graffiti aserorterinertut isigineqarunnaarsillugu, isiginnittaatsip allanngortinneqarnissaa. Graffiti tagsiinaananilu og throw ups-iinnaanngilaq, aamma kusanartuliornerusinnaavoq, tamannalu suliami matumani takutikkusupparput. Inuusuttut isumassarsioqquagut.
Suliat marluk naammassineqareerput, allalu sisamat suli suliarineqaratik. Suliat naammasseriikkat ataani takusinnaavatit.