Kommuneqarfik Sermersuumi borgmesteri Charlotte Ludvigsen siuuttoralugu Arsummi innutaasunik ataatsimiititsimmat takkuttut amerlaqaat. Innuttaasunik ataatsimiititsinermut pingaarnerpaavoq, nunaqarfiup Ivittuullu siunissaat periarfissaqarfiilu pillugit apeqqummut nunaqarfimmi innuttaasunik peqataatitsinissaq. Aamma Arsummiinnerminut atatillugu borgmesteri kommunip suliffeqarfiinut pulaarpoq, Ivittuunilu kommunip illuutaanik takuniaalluni.
Nunaqarfimmi Aqutsisunut siulittaasoq Niels Peter Mikaelsen ingiaqatigalugu innuttaasunik ataatsimiititsitsilinnginnermi aalisartut, atuarfik, meeqqerivik, utoqqaat illorisimasaat minnerunngitsumillu aalisakkanik tunitsivik borgmesteri Charlotte Ludvigsenip pulaarpai, nunaqarfimmiut sunik unammilligassaqarnersut takorluugaqarnersullu paasisaqarfigilluarumallugu. Tamanna pereermat Nunaqarfimmi Aqutsisut ataatsimeeqatigai tassaasut, Niels Peter Mikaelsen, Jørgen Kristensen aamma Hanne Jakobsen. Tassani ilaatigut aalisarnermut tunngasut nunaqarfimmilu sanaartugassanut tunngasut eqqartorneqarput.
– Isumaqarpunga uagut – kommunitut – nunaqarfimmiunik tusaaniarluarnissarput pingaaruteqartorujussuusoq. Maannakkummi Nunaqarfinnut immikkoortumut pilersaarut 2017 – 2021 najoqqutaralugu sulilereerpugut. Kisianni unammillernartut tamaasa Nuummi allaffitsinnit suliarisinnaanngilagut. Unammillernartummi maani nunaqarfimmiut peqatigalugit ataatsimoorluta suliarisinnaavavut – taamaassappallu maaniittariaqarpugut tusarnaarlutalu, borgmesteri Charlotte Ludvigsen oqarpoq.
Ulloq taanna kingusinnerusukkut Kommuneqarfik Sermersuup nunaqarfimmi innuttaasut ataatsimiigiaqqullugillu sammisaqartippai. Innuttaasunik ataatsimiititsinermi sanaartugassat ingerlatsinermullu tunngasut killiffii kommunimi atorfillit ilisimatitsissutigaat, taakkununnga ilanngullugu 2020-2024-mut Arsuup ineriartornissaanut pilersaarut saqqummiullugu. 2024 tikillugu ineriartortitsinissamut pilersaarutit juunip qaammataani Paamiuni Kommuneqarfik Sermersuumi nunaqarfinni aqutsisut tamarmik peqataaneranni eqqartorneqarput. Tamatuma saniatigut Arsummi inuussutissarsiutitigut periarfissaq saqqummiunneqarput, ataatsimeeqataasullu apeqqutaat kommunimi atorfilinnit akineqarlutik.
Tamanna pereermat ataatsimeeqataasut suleqatigiikkuutaartinneqarput, taavalu Arsuk Ivittuullu pillugit isummatik oqaasinngortissagaat qinnuigineqarlutik. Nunaqarfimmiut eqeersimaarlutik oqallitereermata suleqatigiikkuutaat takorluukkaminnik saqqummiussipput, ilaatigut qaqqasiortitsinerit umimmannillu tunisassiat pillugit, taakkualu eqqarsaatigalugit kommune sutigut ikiuussinnaanersoq saqqummiussillutik.
Innuttaasut saqqummiukkusutaat siunissami atorluarneqassapput, kommunip atortulersuutai nunaqarfimmilu inuussutissarsiornikkut periarfissanik ineriartortitsineq atorlugit Kommuneqarfik Sermersooq nunaqarfimmiunut qanoq tarpersersuisinnaanersoq ataavartumik nalilersorneqarpat.
Ivittuut Kangilinnguillu tikillatsiarneqarput
Arsummiinnerup saniatigut aamma Kangilinnguit/Grønnedal Issittumilu Sakkutooqarfik tikinneqarput, taakku nunakkut immakkullu angallassissutinik ingerlatitsisulerlugit kommunimut atukkiipput. Ivittuunut tikinnerup kinguninnguatigut borgmesteri kommunimilu atorfilittat Arsummi Nunaqarfimmi Aqutsisunit ingiaqatigineqalerput. Ataatsimoorlutik kommunip illuutai takuniarpaat. Ivittuuneereernerup kingornagut Kangilinnguit alakkapallanneqarput, tassanilu Issittumi Sakkutooqarfik sutugassiissuteqalaarluni.
Angalanermit assit uani takukkit.