Services

Ukioq manna amerikamiut qimataanik saliinissaq maannakkut aalajangerneqarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersooq Sermersuup kommuneqarfiata iluani amerikamiut qimataannik saliinissamut kalaallinit qallunaanillu aqutsigisoqatigiinnik pilersitsisuusutut sulinini nangeqqippaa.

Ukioq manna aammaarluni Kommuneqarfik Sermersuumi Ingerlatsinermut Avatangiisinullu Immikkoortortaqarfik Sermersuup kommuneqarfiata iluani amerikamiut qimataannik saliinissamik suliniuteqassaaq.

Ukioq manna saliinermi sumiiffit pingasut ukua qitiutinneqassapput: Whalerus Bay Ittoqqortoormiit eqqaaniittoq, Ikkatteq Tasiilap eqqaani aamma Nuup kujataaniittoq Marraq.

Whalerus Bayimi eqqakkanik qimatanillu katersisussatut, imikkoortiterisussatut poortuisussatullu najukkami entreprenøri ITT-byg kommunimit isumaqatigiissusiorfigineqarpoq. Eqqakkat poortorneqartut ESANIp eqqakkanik assartuinissamut attartugaanik umiarsuarmik septemberip qaammataani assartorneqassapput.

Ikkatimi ukioq kingulleq entreprenøri kujataanersoq, 60-north isumaqatigiissuteqarfigineqarsimasoq ingerlateqqinneqassaaq. 2019-imi suliaqarnermi uulianut nappartat 15.000-it saviminikullu allat piiarneri misilittagaqarfigineqartut ukiormanna atorluarneqassapput. Suli uulianut nappartat 25.000-t saviminikut annertuut sanaartornermilu eqqakkat asbestimik PCB-imillu akulinnik peqarnera naatsorsuutigineqarpoq. Ukioq manna suliniuteqarnermi sumiiffiup siunnissami qanoq isikkoqassanersoq qulequttat inuilli pilersitaat sorliit takusassiatut Ikatimi uninngatiinnarlugit Tunumi takornarialerisunut iluaqutissanngorlugit kommune, takornariaqarnermut siunnersuisooqatigiit najukkamilu suliniuteqartunit ataatsimut pilersaarusioqatigiinnissaat naatsorsuutigineqarpoq.

Naggasiullugulu Marrami saliinissaq tamanut suliarinnittussarsiuusisoqassaaq ukioq manna naammassineqavittussanngorlugu. 2019-imi suliniuteqarnermut tunngatillugu, Marrami saviminikut annertuut piiarneqarput nunngutaalu ukiassariartulernerani piiarneqarsinnaaneri naatsorsuutigineqarpoq.

Kommuneqarfik Sermersuumut politikkikkut saliinissamut isumaqatigiissut tapersersornissaa pingaaruteqarpoq kalaallinittaaq suliffeqarfiutigineqartut saliinermut peqataanikkut suliassanut assingusunut misilittagaqalernissamut periarfissiinissaq qulakkeerniarlugu.

Kalaallit qallunaallu aqutsisoqatigiit ataatsimut suliaqarnerat Ilisimatusarnermut Avatangiisinullu Naalakkersuisoqarfimmit, Danmarkimi fødevarestyrelsenimit kiisalu Illersornissamut qullersaqarfimmit ataqatigiissarneqartarpoq. Illersornissaq pillugu isumaqatigiissummi 2018-2023-imut tunngasumi, katillugit 180 mio. kr.-t saliinissamut immikkoortinneqarsimapput.