Services

Tasiilami suliffeqarfimmik aallarniisut periutsiminnik allannguipput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Tasiilami inuusuttunut piniarnermut tammaarfik nalaatsornikkut pisorpassuit kingunerannik pilersinneqarpoq, tamatumanilu Tasiilami suliffeqarfimmik aallarniisut, Sermersuumi Inuussutissarsiornermut Immikkoortortaq aamma Covid 19 akuupput.

Line aamma Tobias Tasiilami takornarialerinermik aallarteqqammisaminnut pitsaalluinnartumik pilersaaruteqaraluarput. Sermersuumi Inuussutissarsiornermut Immikkoortortaq suliffeqarfimmik piareersaanerup nalaani tapersersuilluni ikiuuppoq, suleqatigiit isumassarsiaata qanoq tuniniarneqarsinnaatigineranik misissuilluni aamma kukkunersiuisartunik eqqartuussissuserisunillu attaveqarfigisinnaasaannik nassaassullugit. Taavali Covid-19 atuutilerpoq takornarianillu tikittoqassaavippoq.

”Paasivarput suliffeqarfik qanittukkut aallartissinnaanavianngitsoq. Taamaattumik immitsinnut aperivugut: Maanna qanoq iliussaagut sunalu tunniussinnaavarput?” Line Kristiansen oqarpoq.

Taanna peqqissaasuuvoq Tobiasilu piniartuuvoq, taamaattumik taakku inunnik attaveqateqartarneq kiisalu piniarneq aalisarnerlu piginnaasaqarfiginerpaasaasa ilagaat.

Piniarnermut tammaarfik pilersinneqarpoq

Takornarissanik sullissisinnaajunnaaramik Line Tobiasilu isumaqatigiipput nunaqqatitik arlaatigut sullinniarlugit. Inuusuttut, ingammillu siunissamik qanoq ittuunissaanik nalornissutiginnittut sullinniarlugit toqqarpaat. Pinngortitarsuarmukartitsisarnissaq pilersaarutigaat, taavalu piniarneq, aalisarneq tammaarfissamillu piareersaaneq sammineqanngikkaangata inuusuttut assigiinngitsut pillugit oqaloqatigisarusuppaat taakkualu eqqarsaartaat takorluugaallu paasiniarlugit.

Inuusuttut kajumissaarneqarnissaat tunngaviusumik isumaavoq. Sullissisuunngilagut, kisianni uagut aallarnisaanerpullu assersuutitut atorlugit inuusuttut sorusunnerminnik eqqarsaatiginnilernissaannut isummersorsinnaavavut,” Line Kristiansen oqarpoq.

Sermersuumi Inuussutissarsiornermut Immikkoortortaq ikiuunnissaminut allanngortiterinerup nalaani piareersimavoq, Majoriamullu attaveqalernissaq isumagalugu. Soqutiginnittoqaqaaq taamaattumillu paaqqinniffiit arlallit peqataatinneqalernissaat eqqarsaatigineqarpoq.

Linep Tobiasillu suliniut taanna nuannarilingaaramikku pilersaarutigaat takornarianik sullissineq aallarteqqikkaluarpalluunniit ingerlatiinnarniarlugu.   

Inuusuttut siulliit u. 7-13-aggusti piniarnermut tammaarfimmukarlutik aallassapput.