Innuttaasunut

Hans Egedep eqqaassutissaa qanoq pineqassava? Illit isummat politikerinut tusartiguk

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Borgmester Charlotte Ludvigsenip illit innuttaasutut Hans Egedep eqqaassutissaata siunissami qanoq pineqarnissaa pillugu oqallinnermi tusarneqarnissat pingaartillugu oqallinnermik pilersitsivoq. Peqataasinnaavutit isummallu internetsikkut, allakkatigut ammasumillu oqalliseqatigiinnikkut saqqummiussinnaallugu. Aamma meeqqat inuusuttullu oqalliseqataanissaat isummersoqataanissaallu pingaartinneqarpoq. Uani atuaruk qanoq, qaqugulu tusarneqarsinnaanerit periarfissaanersoq.

Hans Egedep eqqaassutissaata oqallissigineqarnera ingerlajuarsinnarpoq, taamaattumillu qinikkat ataatsimiittarfimmi apeqqut pillugu septembarip aallaqqaataani 2020 eqqartuinnginneranni innuttaasut tusarneqarnissaat Kommuneqarfik Sermersuumit pingaartinneqarpoq.

Juulip pingajuanniit septembarip aallaqqaataata 2020-p tungaanut ingerlatsinissamik pilersaarut

 

Imatut peqataasinnaavutit isumallu tusartillugu:

Internitsikkut Kommuneqarfiga-mi taasinikkut

Innuttasut peqataatinneqarnerulernissaat pillugu kommunip internitsikkut atortorissaarutitaavanni taasisinnaavutit. Taasinermi peqataassaguit Kommuneqarfiga-mi atuisutut nalunaarsoqqaassaatit, oqaatigissallugulu pingaaruteqarpoq taasineq kinaassutsimik ersersitsisisuussanngilluinnarmat. Kommuneqarfiga-mi atuisutut nalunaarsorsinnaavutit taasinermilu juulip pingajuanniit juulip 21-ata tungaanut ingerlasussami peqataasinnaallutit. Innuttaasoq ataasiaannarluni taasisinnaavoq.

Kommuneqarfiga-mi atuisutut nalunaarsorit uani.

Allakkatigut taasineq

Allakkatigut aamma peqataallutillu isummat tusartissinnaavat. Taasineq kinaassutsimik ersersitsisuussanngilaq, kisianni tassa atit allattariaqarpat taamaaliornikkut qulakkeerusupparput internetsikkut allakkatigullu qinersinnginnissaq.

Immersuiffissaq Innuttasunik Kiffartuussivimmut aasinnaavat imaluunniit sermersooq.gl-ikkut immersorsinnaavat.

Oqallitsitsineq

Kommuneqarfik Sermersooq juulip 20-anni nal. 19.00-21.00 innuttaasunik ataatsimiigiaqqusivoq, tassanilu eqqaassutissiaq siunissaalu pillugu oqaloqatigiinnissamut kikkut tamarmik tikilluaqqusaapput.

Meeqqat inuusuttullu peqataatinneqarnerat

Inuiaqatigiinni oqallinneq aamma meerartatsinnut inuusuttortatsinnullu sunniivoq. Meeqqat innuttaaqataasutut pisinnaatitaaffii eqqarsaatigalugit, meeqqat inuusuttullu pisumi peqataatinneqarnissaat pissusissamisoorpoq periarfissaallunilu.

Ilaatigut kinaassuserput, kulturerput, oqaluttuarisaanerput siunissarpullu pillugu aggustip ingerlanerani meeqqanut inuusuttunullu workshoppertitsisoqassaaq. Tamatuma saniatigut aamma Nuuk Ugeavis aqqutigalugu peqataasoqarsinnaassaaq.

Akissutit tiguneqarsimasut suliarineqarnerat
Innuttaasut akissutaat tiguneqarsimasut tamarmik aammalu Hans Egedep eqqaassutissaa pillugu isummersuutit tiguneqarsimasut tamarmik katersorneqassapput, taavalu Aningaasaqarnermut Inuussutissarsiornermullu Ataatsimiititamut aggustip ulluisa 20-anni saqqummiunneqarlutik, septembarillu aallaqqaataani 2020 kommunalbestyrelsimi oqaluuserineqassapput, eqqaassutissallu qanoq pineqarnissaa tassani inaarutaasumik aalajangiiffigineqassalluni.