Innuttaasunut

Borgmesteri juulip 28-aniit 30-annut Arsummut tikeraassaaq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Borgmester Charlotte Ludvigseni juuli naggaserlugu Arsummiissaaq. Kommuneqarfik Sermersuumi atorfilittat ilagalugit nunaqarfimmi suliffeqarfiit aalisartullu alakkarniarpai innuttaasunillu ataatsimiititsinissamut nunaqarfimmiunik tamanik aggersaalluni.

Juulip 28-aniit 30-annut borgmesteri Charlotte Ludvigsen Arsummiissaaq. Pisortatigoortumik pilersaarut ulloq 29-anni ullaakkut aallartissaaq, nunaqarfiup aalisartui, atuarfik meeqqerivik kiisalu kommunip illuutai alakkassavai. Pilersaarutitut kingullertut nunaqarfimmi aqutsisunik ataatsimeeqateqassaaq.

Borgmesteri unnukkut innuttaasunik ataatsimiititsinermi nal. 19.00-imi pisussami tikilluaqqusissaaq, kikkunnulluunniit kaffisorialaarnissamut, kaagisorialaarnissamut minnerunngitsumillu oqaloqatiginnilaarnissamut tikilluaqqusaapput.

”Arsuliarnissannut innuttaasunillu naapitaqarnissannut assut qilanaarpunga. Sapinngisamik pitsaasumik siunissaqarsinnaaqqulluta pissutsit qanoq innerinut nunaqarfimmiut isumaat isumassarsiorfiginissaat pingaaruteqarluinnarpoq. Tamanna pillugu neriuutigaara, amerlasuut innuttaasunik ataatsimiititsinermut takkukkumaartut,” Charlotte Ludvigseni oqarpoq.

Aammattaaq kommunimi sulisut piffissap ilaa atorlugu Sanarfinermut Avatangiisinullu Ingerlatsivimmi killiffiit pillugit ilisimatitsissuteqassapput.

Angalaqatigiit juulip 30-anni aallannginneranni borgmesteri ullaap tungaani innuttaasunik oqaloqatiginnissaaq.