Services

Sermersuup inuiattut ullorsiorneq digitalimik nalliuttorsiutigissavaa

Ukioq manna inuiattut ullorsiornerup nalliussineqarnera peqqussutigineqartut malillugit Kommuneqarfik Sermersuup ingerlatissavaa. Tassa imaappoq, nalliuttorsiorneq digitalimik toqqaannartumik aallakaatitsineq iluaqutsiullugu ingerlanneqassaaq. Digitalimik nalliuttorsiorneq nunatta nakorsaaneqarfiata COVID-19 eqqarsaatigalugu innersuussutai malillugit ingerlanneqassaaq.

Ukioq manna programmimi pisussarpassuupput, illilli tamaasa angumeriniarlugit ulapittariaqanngilatit. Tassami ukioq manna pisut tamarmik Facebook-ikkut toqqaannartumik aallakaatinneqassapput. Taamaattumik ilaquttatit, ikinngutitit suleqatitilluunniit peqatigalugit Kommuneqarfik Sermersuup Facebook-ikkut nittartagaatigut kiakkernalluunniit malinnaasinnaavutit.

Aliikkusersuinerpassuit nipilersornerillu saniatigut ukiut tamaasa ingerlanneqartartoq puiseqqaaniunneq ullaarnganiit aallartinneqartoq aamma takusinnaavat. Ullup ingerlanerani puisit marluk pilanneqartut, Kommuneqarfik Sermersuumit utoqqaat illuinut tunniunneqannginnerini, aamma malinnaavigisinnaavatit.

Nunatta nakorsaaneqarfiata katersuunnerit pillugit innersuussutai malikkumallugit, taamaalillunilu coronavirusip tuniluunnissaata annikinnerpaaffianiitinnissaa pillugu, inuiattut ullorsiorneq toqqaannartumik aallakaatinneqassaaq.

– Inuiattut ullorsiornerup digitalimik nalliussineqarnissaanik aalajangernerput qamuuna annerigigaluarlugu aalajangiupparput. Ullormik nalliussineq kommunimi innuttaasut peqatigalugit pisarnera assut nuannarisarpara. Massakkut inuiattut ullorsiornissarput ataatsimoorluta Sermersuumi innuttaasut tamaasa peqatigalugit pinissaa qilanaarivara. Uannut pingaartuuvoq inuiattut ullorsiornerup tamatta ataatsimoorluta nalliuttorsiutiginissaa. Asasavut ilagalugit toqqissisimasumik, nuannersumik aamma nalliuttorsiorpalaartumik ingerlanneqassaaq. Digitalimik aaqqiissuteqarnitsigut nunatta nakorsaaneqarfiata innersuussutai pingasut tamaasa malissavagut, borgmesteri Charlotte Ludvigsen nassuiaavoq.

Ullaarnganiit inuiattut ullorsiornerput – ulloq 21. juuni – Kommuneqarfik Sermersuup facebook-ikkut nittartagaatigut malinnaavigisinnaavat, tassani aallakaatinneqartussaammata.

Inuiattut ullorsiornermi puiseqqaanniunneq Katuap aaqqissuuppaa.