Kommuneqarfik Sermersuumi sinerissap qanittuani aalisartut namminneq immikkoortumut pilersaaruteqalissapput.
Ullumikkut Kommuneqarfik Sermersuumi Aningaasaqarnermut Ataatsimiititamit kommunip sinerissap qanittuani aalisarnermut immikkoortumut pilersaarutaa siulleq tusarniaassutigissallugu akuersissutigineqarpoq.
”Aalisarneq piniarnerlu kulturitsinni pingaaruteqarluinnarpoq, najugaqarfitsinnilu arlalinni aalisartut aningaasaqarniarnermut isumalluutaanerpaapput. Taamaattumik piniarnermut sinerissallu qanittuani aalisarnermut aningaasaliinissatsinnut qulakkeerinissamut atortussaqalernerput nuannaarutigaara”, Kommuneqarfik Sermersuumi borgmesteri Charlotte Ludvigsen oqarpoq.
Immikkoortumut pilersaarut immikkoortup inissisimaneranik, pisariaqartitanik kissaatigineqartunillu aaqqissuussaasumik misissuineruvoq. Immikkoortumi pilersaarutit immikkoortumi sanaartornermut aningaasaliissuteqarfigisassanut pilersaarusiornermut tulleriiaarinermullu atorneqartarput – Siornatigut immikkoortumut assigiinngitsunut arlalinnut immikkoortumut pilersaarusiortoqartareerpoq, ilaatigut atuarfeqarnermut, utoqqarnut kiisalu nunaqarfinnut tunngasunut.
Immikkoortumut pilersaarummi matumani najukkani ataasiakkaani inuussutissarsiutigalugu aalisartut qassiunersut kommunimiilu illut sorliit atugassiissutigineqarsimanersut ilaatigut takutinneqarpoq. Tamatuma saniatigut immikkoortumut pilersaarummi aningaasaliissutit salliunneqartariaqartut allattorsimapput. Assersuutigalugu Tunumi umiarsualiviit itisilerneqarnissaat pingaartinneqarluinnarpoq.
”Kommunalbestyrelsimi aalisartortatta piniartortattalu pitsaanerpaamik atugassaqartitaanissaat kissaatigineqarpoq. Immikkoortumut pilersaarutip aningaasatigut isumatusaartumik atornissaanut toqqammavissippaatigut”, Charlotte Ludvigsen oqarpoq.
Immikkoortumut pilersaarutit inaarutaasumik akuersissutigineqannginnerani maanna sapaatip-akunnerini qulini aalisartut piniartullu kattuffiinut tusarniaassutigineqassapput.