Services

Kajumissuseq tunngavigalugu isumaginninnermi sulinermut tapiissutit

Ukiut tamaasa Kommuneqarfik Sermersooq kajumissuseq tunngavigalugu isumaginninnermi sullissisunut tapiissuteqartarpoq. 2020-mi marloriarluni qinnuteqartitsinermi siullermi kajumissuseq tunngavigalugu suliniutit marluk tapiiffigineqarput, Kommuneqarfik Sermersuumi immikkut ikiortarialinnut sanngiinnerusunullu tunngasunik allanngueqataarusuttunut. Pineqartut tassaapput Nuummi Natteravnene aappaalu Mad og Masterclass.

Ukiut tamaasa Kommuneqarfik Sermersooq kajumissuseq tunngavigalugu isumaginninnikkut sullissisunut aningaasaliissuteqartarpoq. Peqatigiiffinnik, kattuffinnik inuilluunniit ataasiakkaat inuuniarnermikkut ajornartorsiuteqartut sammisassaqartinnissaannut suliniuteqartunut aningaasaliissuteqarnissaq siunertaavoq.

2020-mi marloriarluni qinnuteqartitsinermi Suliffeqarnermut Isumaginninnermullu Ingerlatsivik nammineq kajumissuseq tunngavigalugu suliniutinut inunnut tunngasunut qinnuteqaatinik marlunnik pissarsivoq akuersissuteqarlunilu.  Suliniutit marluk, tapiiffigineqartut tassaapput Nuummi Natteravnene aammalu Mad og Masterclass.

– Suliniut taakku marluk tapiiffigisinnaagatsigit nuannaarutigaara, taakkuummata inuusuttut toqqissimanissaannik pitsaasumillu inuuneqarnissaannut tunngasunik pilersitseqataasut. Nammineq kajumissuseq tunngavigalugu suleqataajumasut qujaruttassavagut, matumanilu assersuutissaqqissumik takussutissiisoqarpoq, Kommuneqarfik Sermersuumi Suliffeqarnermut Isumaginninnermullu Ataatsimiititami siulittaasoq Inge Olsvig Brandt oqaluttuarpoq.

Nuummi Natteravnene ornitassatut neqeroorutit allat piffissani matoqqaffiini meeqqat inuusuttullu inersimasunut akisussaassusilimmik saaffiginninnissaminnut periarfissittarpaat. Natteravnene siunertarivaat meeqqat inuusuttullu inuunerminni nuannaarnerulernissaannut  toqqissisimanissaat ikiorneqarnissaallu. Suliniut 25.000 kr.-nik tapiiffigineqarpoq.

Suliniummi Mad og Masterclass-imi inuttut ataatsimoorfeqarnissaq nerisassiornissarlu pingaarnerutinneqarput. Uani inersimasup pitsaasunik nerisassiorsinnaasup inuusuttut ikiortariallit Foodlab-imut qaaqqusinnaavai, tassanilu ataatsimut pitsaasunik peqqinnartunillu nerisassiorsinnaapput. Suliniut 46.500 kr.-nik tapiiffigineqarpoq.

Naggasiullugu Suliffeqarnermut Isumaginninnermullu Ingerlatsiviup nalunaarutigissavaa, aappassaanik qinnuteqartitsinissamut oktobarip aallaqqaataat 2020 killigitinneqarmat.

Qinnuteqartitsinermut tunngasut kommunip nittartagaani atuarneqarsinnaapput.