Kommuneqarfik Sermersuumi Kommunalbestyrelsip innuttaasunik peqataatitsinermi periusissiaq nutaaq akuersissutigaa. Tassuuna qulakkeerneqassaaq innuttaasut ulluinnarni sullinneqarneranni isumaannik tusaaniarnissaq. Innuttaasunik peqataatitsineq Kommuneqarfik Sermersuumi pingaartinneqartorujussuuvoq, kisianni periusissiaq nutaaq atorlugu sullissinerup nukittorsarneqarnissaa borgmesterip naatsorsuutigaa.
Juunip qulingiluaanni kommunalbestyrelsip ataatsimiinnerani innuttaasunik peqataatitsinissamut periusissiaq kommunalbestyrelsimit tamarmiusumit akuersissutigineqarpoq. Periusissiami piumasaqaatigineqarpoq, aalajangiinerni innuttaasut qanoq qaqugulu peqataatinneqartassanersut, ingerlatsivimmullu assigiinngitsunik atortorissaarutinik periarfissiivoq, innuttaasunut ersarissumik eqaatsumillu sullissinissaq qulakkeerniarlugu. Taakku kattullutik innuttaasunik peqataatitsisarnerit ingerlanneqartarnerat aalajangiisartunut innuttaasunullu pissarsiffiulluartarnissaannik kinguneqassapput.
Kommuneqarfik Sermersuumi borgmester Charlotte Ludvigsenip tamat oqartussaaqataanerat naapertorlugu pitsaanerusumik peqataatitsinissaq anguniagassatut sulissutiginiarpaa. Taamaattumik periusissiaq nutaaq nuannaarutigaa.
– Innutaasunik peqataatitsineq uannut pingaarutilerujussuuvoq. Kommune ineriartortissavarput innuttaasunit najugaqarfigiumaneqartoq, aatsaalli taamaaliorsinnaavugut taakku akulikitsumik isumasiortarnerisigut. Taamaattumik aamma nuannaarutigaara kommunalbestyrelsip innuttaasunik peqataatitsinissamut tunngasorpiaq pillugu annertuumik pisussaaffilimmillu periusissiaq akuersissutigimmagu. Qanorluunnit angerlarsimagaluarunik imaluunniit namminneq takkullutik peqataaniarpata, taava tamarmik tusarniarneqarsimanissaat qulakkiissavarput, Charlotte Ludvigsen oqarpoq.
Kommuneqarfik Sermersooq innuttaasunik isumasiuisarnermik pitsaasunik misilittagaqareersoq taassuma eqqaavaa.
– Kommunalbestyrelsimut ilaasortaanera tamaat nalunngilara innuttaasut peqataatikkaangatsigit sulinitsinni pitsaasunik angusaqartarluta, taakkuummatami sullitavut ”, Sermersuumi-borgmesteri oqarpoq.
Periusissiami akuerineqaqqammersumi suliniutit najukkamut naleqqussarneqarnissaannik qulakkeerinnittussaavoq, aammalu inaarutaasumik aaqqiissutaasussat innuttaasunut aalajangiisartunullu isumaqartussaallutik. Imaappoq, innuttaasunik peqataatitsinermi tamarmik imaluunniit ataasiaannartumik aaqqissuussinerit ilusileriartulissapput sunalu pineqarnersoq, sullitassat, suliassaq ataaseq, kissaatigineqartullu sulinermut ilanngukkusutaq apeqqutaatillugu siunnerfilinnik atortussarsiffiussalluni.
Periusissiap nutaap ilaatut Kommuneqarfik Sermersooq innuttaasunik peqataatsinermi digitatilimik atortorissaarutitaareerpoq: Kommuneqarfiga. Nittartakkami tassani innuttaasut maannakkut suliniutigineqartunut paasisassarsiorsinnaapput, assigiinngitsutigullu kommunimi ineriartortitsinermi suliniutinut peqataasinnaallutik.