Nunarsuaq tamakkerlugu sulisartut ulluanni borgmester Charlotte Ludvigsen oqalugiassaaq. Oqalugiaat tamakkerlugu atuarsinnaavat, matuma kinguliani. Charlotte Ludvigsenip oqalugiaammini ataatsimoornissatta pingaaruteqartuunera erseqqissarpaa.
Oqaatigineqartut atuupput.
Ukioq manna Kommuneqarfik Sermersuumi borgmesteritut maajip aallaqqaataani siullerpaamik oqalugiarpunga. Takorloorsimagaluarpara Nuummi katersortarfimmi sulisartorpassuit nunarsuaq tamakkerlugu sulisartut ulluannik nalliuttorsiutiginninnissamut oqalugiarfigissallugit.
Kisianni ullut tamaasa eqqaasinneqartarnitsitut, massakkut ajornarallarpoq. Taamaattumik ullumikkut interneti ikiortigalugu ilissinnut anngusserusuppunga. Neriuppunga ukiup tulliani qanimut takusinnaassasugut,
Pisarnitsitut ingerlaqatigiissinnaanngilagut naak ukioq kingulleq nuanneraluaqisoq. Taamaattorli isiginngikkaluarluta qanimut ataqatigiillaqqissinnaaqaagut.
Inuiaqatigiiuvugut inunnik allanik peqateqarnermik iluarisimaarinnittut ataatsimoorusussuseqartartut– ingammik ikinngutinik ilaquttanillu. katersuussinnaannginnerli eqqortuliorneruvoq.
Qaammatini kingullerni oqaatsimik nutaamik toraarsiuarpunga. Inuiaqatigiinni pingaarutilik. Inuk suliffimmini sulinngippat inuiaqatigiillu unittoorpata taava inuk taanna inuiaqatigiinni pingaarutilimmik atorfeqarpoq. Coronamillu nalaataqarnitta ersersippaa inuiaqatigiinni kikkut tamarmik pisariaqartinneqartut. Inuiaqatitsinnut tamatta pingaaruteqarpugut, susoqarpalluunniit inuiaqatigiit ingerlasussaapput. Tamanna qaquguluunniit puigunngisaannassavarput. Tamatta naleqarpugut.
Soorlu eqqaalaaginnarsinnaavagut pisiniarfinni sulisut, ilisivinni pisiassaqarnissaanik isumaginnittartut pisiniartitsut
Angallassisut, inuit pisiassallu isumannaatsumik apuuffissaannut isumaginnittut.
Angerlarsimaffinni ikiortit, sanngiinnerusunut eqqiluisaarnissamik isumaginnittut.
Aalisarnermi aningaasaqarnitsinnik kaaviaatitsut, allaffissornermilu sulisut sullissisinnaallutik ammatitsisut.
Taamatullu ingerlaannarsinnaagaluarpunga. Inuit inooqataasutut pisussaanermik misigisimatitsisuupput ersoqatigiisitsillutillu. Taakku ersaartaatissavagut – aamma ullumi.
Qaammatini aggersuni nunarsuaq tamakkerlugu tunillaassuunneq ingerlagaluarpat qanorluunniit kommunitsinnut coronamik nalaataqarnerput ilungersunartuuvoq. Nunatsinni inuit sulisut neriulluartitsisuupput. Unammillernartoq paasinninnissigut akueraarsi, qaqugukkut angerlarsimaannarnissaq ungasillisimanissarlu aamma qaqugukkut sulisoqassanersoq.
Ilissi iliuuseqarnissigut Kalaallit Nunaat Covid-19-imik annilaarnartumik aqqusaarneqarnerminit siullermit aniguivoq. Virusip nalaannera kingulliugunanngilaq, kisianni qularinngilara akiornissaanut piareersimalluta.
Neriuutigissavarput Covid-19-i inuussutissarsiornikkut qaangilluassagipput, massakkullu takoreerparput suliffinnik atugarissaarnermullu akeqalereersoq. Ajoraluartumik aningaasaqarnikkut kingunerisai ilungersunartut suli takunngilagut. Aningaasaqarnikkut nalaatsinerlunneq kommunitta anigorluassagaa borgmesteritut ilungersuutigissallugu qulakkeerniarpara.
100 procentimik iluatsinnavianngilaq. Inoqassaaq suliffimminnik annaasaqartunik, aningaasaqarnikkut nalaatsinerlunnikkut suliffeqarfeqassaaq matusariaqartunik, ikinnerpaatinniarlugillu uagut politikerit qulakkiissavagut. Qulakkeersinnaavarput suliffiit nunatsinniittut atornerisugut, taamaaliorutta sulisumik sulisoriinnarnissaannut akissaqarniassammata suliffeqarfinnullu atugarissaartitsinissaannik, nutaanik suliffiliulernissaannut qulakkeerinninniarluta.
Kiisalu aningaasaqarneq ilungersunarsippat sanngiinnerusut ajorsartuussanngitsut uagut politikerit qulakkiissavarput.
Coronamik nalaataqarnerlunneq aningaasaqarnikkullu kingunerlutsitsinerit ajunnginnerpaamik qaangerniarlugit, ataatsimuussaagut. Ullumikkut ullup ersersippaa ersoqatigiinnerup pingaaruteqassusaa – oqaluttuarisaanermilu matumani ataatsimoortugut, immaqalu piffissami sivisoorujussuarmi aatsaat malugilerparput ataatsimoornerup pingaaruteqassusaa. Immitsinnut pisariaqartippugut tamannalu eqqaamassavarput. Ataatsimooraangatta nukittunerusarpugut.
Tamassinnut qujanaq nunarsuaq tamakkerlugu sulisartut ulluannik pilluaritsi!