Services

Piniarnermut allagartaq 2020-mi Maajip aallaqqaataa sioqqullugu akilereersimanissaanut piumasaqaat

Piniarnermut allagartaq 2020-mi Maajip aallaqqaataa sioqqullugu akilereersimanissaanut piumasaqaat tuttunniarnissamut umimmanniarnissamullu akuersissutinik qinnuteqarnissamut peqataassagaanni eqqaasitsissutigineqarpoq.

Aalisarnermut, Piniarnermut Nunalerinermullu Naalakkersuisoqarfimmiit matumuuna eqqaasitsissutigineqassaaq 2020-imi aasakkut ukiakkullu tuttunniarnissamut umimmanniarnissamullu akuersissutinik qinnuteqarsinnaanissamut piniarnermut allagartap tuttut umimmaallu pillugit nalunaarutit atuuttut naapertorlugit maajip aallaqqaataa sioqqullugu akilereerneqarsimanissaa. Taamaalilluni piniarsinnaanermut allagartaq maajip aallaqqaataa nallertinnagu akilerneqarsimanngippat tuttunniarnissamut umimmanniarnis-samullu akuersissutinik qinnuteqartoqarsinnaassanngilaq.

Ukiuni marlunni najugaqareersimanissamut piumasaqaat

Ilanngullugu aamma nalunaarutigineqarpoq piniakkanut killilersukkanut, taakkununnga ilanngullugit tuttunniarnissamut umimmanniarnissamullu qinnuteqarsinnaanermut tunngatillugu piffissami qinnuteqarfiusumi Kalaallit Nunaanni minnerpaamik ukiuni marlunni ataannartumik najugaqareersimanissaq pillugu piumasaqaat atuutiinnarmat.

Akuersissutit utertinneqartussaapput

Ilutigalugu APNN-ip paasisimavaa ajoraluartumik tuttunniarnissamut umimmanniarnissamullu akuersissutit tunniunneqartartut affai inorlugit utertinneqartartut. Akuersissutit pisanillu nalunaaruteqarneq piniarnerup naammassineqarnerata kingornatigut kingusinnerpaamik sapaatip akunnerisa marluk qaangiunneranni utertinneqartussaapput tamannalu pisaqarsimanngikkaluaraanniluunniit aamma atuuppoq. Pisanut nalunaarutit amigartumik utertinneqartarnerat pillugu tuttoqatigiit umimmaqatigiillu qanoq innerat nalileruminaappoq.

Kiisalu nalunaarutigineqassaaq ulloq 15. april 2020 sunngiffimmi piniarsinnaanermut allagartanik peqartut 57 % akiliuteqarsimammata aammalu inuussutissarsiutigalug piniarsinnaanermut allagartallit 86 %-ii akiliuteqarsimammata, taamaasillutillu tuttunniarnissamut umimmanniarnissamullu akuersissutinik qinnuteqarsinnaallutik. Taassuma saniatigut inuussutissarsiutigalugu piniarsinnaanermut allagartassamik immikkut qinnuteqartut 200-t allagartamik amigaateqarput.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl