Meeqqanut Ilaqutariinnullu Ingerlatsiviup naartusunut ilaqutariinnullu 0-3-nik ukiulinnik meerartalinnut inuuniarnermikkut ajornartorsiuteqartunut siusinaarlutik iliuuseqarsinnaanissaq pitsanngorsarusuppaa. ”Taamaattumik nuannaarutigeqaarput ulloq 1.4.2020 aallarnerfigalugu angajoqqaanik inuuniarnermikkut ajornartorsiuteqartunik ikorfartuinissamut ikiuinissamullu neqeroorut Amarngivat pilersikkatsigu. Tasiilami meeqqat tamarmik pitsaasumik inuunerminnik aallartitsinissaat anguniagaraarput. Ilisimatusarnikkut siusinaartumik iliuuseqarnerup meeqqamut pitsaanerpaasarneranik ilisimasaqarpugut”, Uju Petersen, Meeqqanut Ilaqutariinnullu Ataatsimiititamut Siulittaasoq oqarpoq.
Poorskereerpat neqeroorut ammarneqassaaq. Iliuuseqarnermi siunertarineqarpoq meeraaqqat inuunerminni toqqissisimanartumik aallartisinnissaat, meeqqap angajoqqaavi annertuumik ikorfartorneqarnissaat aqqutissiuunneqarnissaallu ilaatigut angajoqqaatut sulineq isumaginninnerlu eqqarsaatigalugit. Taamaaliortoqassaaq peqqinnissamik, perorsaanermik aamma isumaginninnermik suliaqartunit malinnaaffigineqarnikkut ikorfartorneqarnikkullu.
Amarngivat pilersinneqaqqaarfimminut atorneqaqqilersoq.
Amarngivat taamani pilersinneqaqqaarmat inuiaqatigiinni meeqqat inuuniarnermikkut ajornartorsiuteqartut ikiortussanngorlugit pilersinneqarpoq. Illu meeqqanit ornigarneqartuaannarsinnaanngorlugu pilersinneqarpoq ukiorpassuillu tamanna atorluarneqarsimavoq, soorluttaaq meeqqanit ingerlalluartunik ilaqutalinnit immikkut pisariaqartitsinngikkaluarluni atorneqarsimasoq. Ajoraluartumilli Tasiilami ilaqutariit inuuniarnermikkut ajornartorsiuteqartut amerlapput taamaattumik Meeqqanut Ilaqutariinnut Ingerlatsiviup Amarngivat massakkut pisariaqartitsinerpaanik ikiunissaq qitiutillugu ingerlanneqassaaq.
Tamanna kommunimi sunngiffimmi susassaqartitsinermi neqeroorutinut allanut sunniuteqassanngilaq.
Amarngivani qitiutitsinerup allanngornera peqqutaalluni kommunimi neqeroorutit allat sipaarniarfigineqarnavianngillat. Meeqqanut inuusuttuaqqanullu tamanut 18-illu inorlugit ukiulinnut sisorartarfiup, timersortarfiup kommunimilu sammisassaqartitsinerit allat akeqassanngillat. Atuartunut 1-3 klassinut atuareernermi ornittakkamiittarnerat pisarnertut ingerlanneqassaaq soorlu aamma sunngiffimmi ornittagaq kiisalu inuusuttunut kulturikkut illorsuup meeqqanit anginernit atorneqarsinnaasoq.
Uju Petersen
Meeqqanut Ilaqutariinnullu Ataatsimiititami siulittaasoq.
Lene Warwick
Tasiilami Meeqqanut Ilaqutariinnullu Pisortaq/Fagchefi.